ჯანდაცვის მინისტრი:“დაუთმეთ მანქანები ოჯახის ექიმებს“

შრომის, ჯანმრთელობის და სოციალური დაცვის მინისტრმა დავით სერგეენკომ ამის შესახებ განცხადება დღეს გააკეთა. განცხადებას „სამხრეთის კარიბჭე“ უცვლელად გთავაზოთ.

"გავაძლიერებთ შპს "თბილისის სასწრაფოს", მივამაგრებთ დამატებით მანქანებს ან თვითონ მენეჯერები ჩამოვიდნენ ცოტა ხნით ამ მანქანებიდან, იგივე ეხება რაიონულ სასწრაფოს. სამსახურებრივი მოხმარების მანქნანები უნდა გადამისამართდეს.

მეც მზად ვარ, რომ ჩემი მანქანა გადავამისამართო ამ მიმართულებით, რათა ოჯახის ექიმმა დაიწყოს სიარული, ცხელ გამოძახებებზე და არ გაუშვან აკივლებული სასწრაფოები, როდესაც სადღაც კაცი კვდება.

როდესაც ცხელი გამოძახებაა რისკჯგუფის პაციენტებში, იქ არ უნდა გავიდეს სრულად აღჭურვილი სასწრაფო ბრიგადა, უნდა გავიდეს მსუბუქი მანქანა, რომელშიც იქნება მარტო ოჯახის ექიმი.

თბილისის და რაიონულ სასწრაფოს მივმართავ რეკომენდაციით, და გინდათ ბრძანებით, მენეჯერები ცოტა ხნით ჩამოვიდნენ საკუთარი მანქანებიდან და საზოგადოებრივო ტრანსპორტით ან ტაქსით იარონ. ყველას აქვს საკმარისი ხელფასი ამისთვის. ეს მანქანები გამოიყენეთ იმისთვის, რომ ამ კატეგორიის გამოძახებებზე გაიდნენ სწორედ ეს მანქანები", - განაცხადა სერგეენკომ.

საგანგებო თათბირზე, მინისტრმა დაავადებათა კონტროლის ცენტრის, თბილისისა და რეგიონული სასწრაფო სამედიცინო დახმარების ხელმძღვანელებისგან დეტალური ინფორმაცია მოისმინა და შესაბამისი მითითებებიც გასცა. მინისტრმა მიმართვიანობის გაზრდის პირობებში, სამედიცინო დაწესებულებებს შესაბამისი ზომების მიღებისა და მზაობისკენ მოუწოდა.

[ვარლამ წიკლაური, ახალციხე]