ნინოწმინდაში მომხდარი მკვლელობის საქმეზე დაკავებული 6 პირიდან ერთი გაათავისუფლეს

ახალციხის რაიონული სასამართლოს მოსამართლემ ნათია მერაბიშვილმა გადაწყვეტილება, სამსაათიანი თათბირის შემდეგ, რამდენიმე წუთის წინ გამოაცხადა. მან პროკურორ ვასილ ოსიძის შუამდგომლობა ნაწილობრივ დააკმაყოფილა.

მოსამართლის განმარტებით, დარიკო–შ უკანონოდ იყო დაკავებული, ამიტომ მერაბიშვილის გადაწყვეტილებით მას აღკვეთის ღონისძიებად 5 000 ლარი გირაო შეეფარდა და დარბაზიდან გათავისუფლდა. დარიკო შ–ს ბრალი დანაშაულის შეუტყობინებლობაში ედება.



დანარჩენ ხუთ ბრალდებულს, რომელთა შორის ერთ–ერთი არასამთავრობო ორგანიზაცია "ერთსულოვნება სამართლიანობისკენ" ხელმძღვანელი ქეთევან ხმალაძეა, აღკვეთის ღონისძიებად პატიმრობა შეეფარდა.

"ჯერჯერობით არ ვიცი გავასაჩივრებთ თუ არა ამ გადაწყვეტილებას", – ამბობს ხმალაძის ადვოკატი ირაკლი ბარძიმაძე.იგი გირაოს 20 000 ლარს ითხოვდა.

დარიკო შ–ს ადვოკატი, ნუგზარ ტყებუჩავა კი აცხადებს, რომ მისი დაცვის ქვეშ მყოფი სოციალურად დაუცველია და შესაბამის ბაზაშიცაა რეგისტრირებული, ამიტომ ბრალდებულს გირაოს უზრუნველყოფა გაუჭირდება:"ამას პრობლემას არ გავხდით, ალბათ ნათესავები დაეხმარებიან".

მისი თქმით, დარიკო–შ ბრალს ნაწილობრივ აღიარებს: "დარიკო ფოთიდანაა, მაგრამ იგი ერთ–ერთ ბრალდებულთან, კობა შ–სთან ერთად აქ ცხოვრობდა. მასზე შესაძლოა ზეწოლა ხორციელდებოდა".

შეკითხვაზე კონკრეტულად ვინ ახდენდა მასზე ზეწოლას ადვოკატი გვპასუხობს:"არ ვიცი, კონკრეტულად ვერ გეტყვით".

მისი განმარტებით, სამართალდამცველებისთვის დარიკოს მომხდარი დანაშაულის შესახებ გამხელაც რომ სდომებოდა, მობილური ტელეფონიც კი არ ჰქონდა.

დარიკო შ–ს ადვოკატი ნუგზარ ტყებუჩავა, ფიქრობდა, რომ მისი დაცვის ქვეშ მყოფი აღკვეთის ღონისძიების შეფარდების გარეშე უნდა დაეტოვებინათ: "მას ორი მცირეწლოვანი შვილი ჰყავს, ვერც ვერავისზე გავლენის მოხდენას შეძლებს".

ბრალდებულები კობა შ. და ნოდარი ა. რომლებსაც ადვოკატები არ ჰყავთ აცხადებდნენ, რომ თუ მათ ახალციხის რაიონული სასამართლო პატიმრობას არ შეუფარდებს პირობას დებდნენ, რომ არც ახალ დანაშაულს ჩაიდენდნენ და არც მიიმალებოდნენ.

შეგახსენებთ, რომ სამცხე-ჯავახეთის პოლიციის დეპარტამენტის და იმერეთის, რაჭა-ლეჩხუმისა და ქვემო სვანეთის პოლიციის დეპარტამენტის თანამშრომლებმა, ერთობლივად ჩატარებული ოპერატიულ-საგამოძიებო ღონისძიებების შედეგად, ჯგუფურად ჩადენილი ყაჩაღობის, განზრახ მკვლელობისა და დანაშაულის შეუტყობინებლობის ბრალდებით 6 პირი: 1971 წელს დაბადებული, წარსულში განზრახ მკვლელობისთვის ნასამართლევი თემურ ბ., 1974 წელს დაბადებული, წარსულში სამჯერ ნასამართლევი ნოდარ ა., 1971 წელს დაბადებული, წარსულში განზრახ მკვლელობისთვის ნასამართლევი კობა შ., 1980 წელს დაბადებული ივანე გ., 1978 წელს დაბადებული ქეთევან ხ. და 1985 წელს დაბადებული დარიკო შ. ახალციხის რაიონის სოფელ ტყემლანაში დააკავეს.

„გამოძიებამ დაადგინა, რომ 2016 წლის 10 იანვარს კობა შ. დანაშაულის მომზადების და დაგეგმვის მიზნით დაუკავშირდა ნოდარ ა-ს, თემურ ბ-ს და ივანე გ-ს. ისინი შეიკრიბნენ ქეთევან ხ-ს საცხოვრებელ სახლში, სადაც დაგეგმეს ნინოწმინდაში, ფულის გატაცების მიზნით, ბაგრატ ს-ზე ყაჩაღურად თავდასხმა. 13 იანვარს ბრალდებულები ბაგრატ ს-ს საცხოვრებელ სახლში მივიდნენ, მის მეუღლეს მოტყუებით გააღებინეს კარი, ძალადობითა და ძალადობის მუქარით ემა ს-ს და მის დედამთილს, სონიკ ს-ს ფული და ძვირფასეულობა მოსთხოვეს. სონიკ ს-მ ბრალდებულებს წინააღმდეგობა გაუწია, რის გამოც თემურ ბ-მ მას დანით ყელის არეში მრავლობითი ჭრილობა მიაყენა. 1936 წელს დაბადებული სონიკ ს. მიყენებული ჭრილობების შედეგად ადგილზე გარდაიცვალა, ხოლო ბრალდებულები შემთხვევის ადგილიდან მიიმალნენ. მათ ტანსაცმელი და დანაშაულის ჩადენის იარაღი - დანა მიმალვისას, საავტომობილო გზაზე გადაყარეს“, – აცხადებენ შინაგან საქმეთა სამინისტროში.

გამოძიება ჯგუფურად ჩადენილი ყაჩაღობის, განზრახ მკვლელობისა და დანაშაულის შეუტყობინებლობის ფაქტზე მიმდინარეობს (საქართველოს სსკ-ის 179-ე მუხლის მე-2 ნაწილის „ბ“ ქვეპუნქტით, 108-ე და 376-ე მუხლებით).

წინა სასამართლო სხდომა 16 მარტს, 14:00 საათზე გაიმართება.

[თამუნა უჩიძე, ვარლამ წიკლაური, ახალციხე]