ფარავნის ჰესის მშენებლობაზე დასაქმებულებმა უხელფასობა გააპროტესტეს

თურქული სამშენებლო კომპანია ”ილ-ჯი” რომელიც ფარავნის ჰესზე გვირაბის გაყვანაზე მუშაობდა, დაუსრულებელ გვირაბს ტოვებს და საქართველოდან მიდის. აქ დასაქმებული მუშები და ადამიანები, რომლებსაც მშენებლობაზე ტექნიკა ჰქონდათ გაქირავებული ანაზღაურების მიღებას ელიან.

”დაქირავებული მძღოლი ვიყავი, 10 ნოემბრიდან გაჩერებული ვართ. კომპანიის წარმომადგენლები იპარებიან, ტოვებენ საქართველოს და მიდიან, ხარჯების ანაზღაურება არ უნდათ”, - აცხადებს რომანი ბერიძე.

ოთხი თვის ხელფასს ელოდება როინ ხმალაძე, იგი ”ილ-ჯისთვის” საკუთარი მანქანით მუშაობდა: ”დღე-ღამეში 200 ლარს გვიხდიდნენ, 24 ათასი ლარი აქვთ ასანაზღაურებელი”.

მუშებთან ერთად თითქმის 20 დღეა კუთვნილ თანხას ითხოვენ ახალქალაქისა და ასპინძის მუნიციპალიტეტის სოლფებში მცხოვრებლები. მათმა ნაწილმა ”ილ-ჯის” საქონელი, ნაწილმა რძე, ყველი, კარტოფილი და სხვა პროდუქტები ჩააბარა.

”ხუთი სული ძროხა მივეცი სასადილოს. აჭამეს მუშებს. ყოველდღე გვპირდებიან დღეს მოგცემთ, ხვალ მოგცემთ და ჯერ კდიევ არ გადაუხდიათ” - აცხადებს ნოდარ შამანაძე.

”ილ-ჯის” მშენებელმა ინჟინერმა ვაჰაპ ჰადიგიუზელმა და ”ილ-ჯის” კემპის ბოსმა მემედ ტოპლუმ ”სამხრეთის კარიბჭეს” განუცხადეს, რომ ყველას კუთვნილი თანხა დღეს ხუთ საათში ჩაერიცხებოდა, თუმცა იცრუეს. ”ილ-ჯის” ბუღალტრის დარეჯან ქოიავას განცხადებით, დარჩენილი დავალიანება დეკემბრის პირველ კვირაში ჩაირიცხება.

რატომ შეჩერდა ”მტკვარი ჰესის” შემდეგ ფარავნის ჰესის მშენებლობაც რეგიონში, რა ვერ გაითვალისწინეს მხარეებმა კონტრაქტზე ხელისმოწერის დროს და სად გაიპარა შეცდომა, ამის შესახებ ”სამხრეთის კარიბჭე” უახლოეს დღეებში გაცნობებთ. ასევე მოგიყვებით დატობირილი ბაღების, მოწამლული საქონლისა და დაკარგული საძოვრების შესახებაც.

[თამუნა უჩიძე, ახალციხე]