მეზობლების დავა შესაძლოა სასამართლოში გაგრძელდეს

შუშანა ანდრანიკიანი თამარაშვილის ქუჩაზე, რვასართულიანი კორპუსის მეორე სართულზე ცხოვრობს. იგი ჩივის, რომ წლებია მესამე სართულზე მცხოვრები მეზობლისგან მასთან წყალი ჩადის, არაერთი გაფრთხილების მიუხედავად, მდგომარეობა არ იცვლება. ბინის მესაკუთრე სამსონიძეები მისი პრობლემით არც კი ინტერესდებიან.

”40 წელია ამ დღეში ვარ. კედლები გაშრობას ვერ ასწრებს, რომ იგივე მეორდება. აქამდე წყალი მარტო სააბაზანოში და სამზარეულოში ჩამოდიოდა, ახლა ზალაშიც ჩამოდის, მეტის მოთმენა აღარ შეიძლება. ვითხოვ, რომ მოყენებული ზარალი ამინაზღაურონ ”, - ამბობს იგი. მისი ვარაუდით, წყალი საკანალიზაციო სისტემიდან ჟონავს.

ბინის მეპატრონე ნათელა სამსონიძე მეზობლის ბრალდებას უსაფუძვლოს უწოდებს.

” წყალი ჩემგან არასოდეს ჩასულა. ამჟამად ბინა გაქირავებული მაქვს, მდგურებს ონკანი შემთხვევით ღია დარჩათ და ამიტომ ჩავიდა. უთხრეს, რაც გაგიფუჭდათ, გაგიკეთებთო, მეტი რა უნდა?! ადრე წყალი ჩემგან კი არა, ზემო სართულიდან ჩამოდიოდა და მაშინ მეც დავზარალდი”,- ამბობს იგი.

მდგმურები, რომლებიც სამსონიძეების ბინაში ცხოვრობენ, კომენტარისგან თავს იკავებენ. პირად საუბარში კი ამბობენ, რომ წყალი მეზობელთან მათი დაუდევრობის გამო არ ჩასულა და შესაბამისად, ზარალის ანზღაურებაზეც ბინის მეპატრონემ უნდა იზრუნოს.

დაზარალებულმა დახმარების თხოვნით უბნის ინსპექტორსაც მიმართა. ანდრანიკიანი ამბობს, რომ ინსპექტორ- გამომძიებელმა მამუკა გელაშვილმა სამსონიძეებიც და მათი მდგმურებიც ორჯერ გააფრთხილა: ”ინსპექტორის გაფრთხილების შემდეგ, ერთხელ ჩამოვიდნენ და მითხრეს, რაც გავაფუჭეთ, გაგირემონტებთო. მერე აღარ გამოჩენილან. ასე მოხდა წინა მდგმურების შემთხვევაშიც. შემპირდნენ და ისე წავიდნენ, არაფერი აგააკეთეს”.

”სამხრეთის კარიბჭე” უბნის ინსპექტორ-გამომძიებელს მამუკა გელაშვილს ტელეფონით დაუკავშირდა. გელაშვილმა საუბარში დაგვიდასტურა, რომ მსგავსი დავა მართლაც არსებობს, თუმცა, ოფიციალურ კომენტარზე უარი გვითხრა, რადგან ძალოვანი სტრუქტურის წარმომადგენლებს პრესასთან ურთიერთობა აკრძალული აქვთ.

ანდრანიკიანი მეზობლისაგან მიყენებული ზარალის ანაზღაურებას უმოკლეს ვადაში ითხოვს. იმ შემთხვევაში თუ ბინის მეპატრონე, ან ამჟამად იქ მცხოვრებლები მის მოთხოვნას არ დააკმაყოფილებენ, დავის გაგრძელებას სასამართლოში აპირებს.

[თინათინ ზაზაძე, ახალციხე]