ახალციხის ბიბლიოთეკაში მიხეილ იაძის ნახატების გამოფენა გაიხსნა [Photo]

გამოფენის გახსნას ადგილობრივი თვითმმართველობის წარმომადგენლები, პედაგოგები, სასულიერო პირები, მიხეილ იაძის მეგობრები და მისი შვილი, ზურა იაძე ესწრებოდნენ.

„მოხარული ვარ, რომ დღევანდელი დღე მიხეილ იაძის შემოქმედებას დაეთმო. აქ გამოფენილი თითოეული ნამუშევარი არა მხოლოდ ჩემი, არამედ მთელი ქართველი ერის საკუთრებაა. ეს ისტორიას შემორჩენილი ნახატებია, რომლებიც მხატვარმა მომავალ თაობას დაუტოვა“, – ამბობს ზურა იაძე.

გამოფენა ცენტრალური ბიბლიოთეკისაა და ახალციხის მერიის კულტურის სამსახურის ორგანიზებით მოეწყო.

„ჩვენი მიზანია მომავალ თაობას გავაცნოთ მიხეილ იაძის შემოქმედება. ეს გამოფენა ძირითადად სკოლის მოსწავლეებისა და ახალგაზრდებისთვისაა. მათ აუცილებლად უნდა იცოდნენ მიხეილ იაძის შესახებ“, – აცხადებს კულტურის დაწსებულებათა გაერთიანების დირექტორი ზაირა კელაპტრიშვილი

დამთვალიერებელს იაძის შემოქმედების ხილვა ბიბლიოთეკის ფოიეში ორი კვირის განმავლობაში შეეძლება.







[თეონა თაბუნიძე, ახალციხე]