ახალციხის სასამართლოში ბრალდებული ცუდად გახდა

ამ წუთებში, ახალციხის რაიონულ სასამართლოში პოლიციელებზე თავდასხმაში ბრალდებული ბესიკ. ხ–ს დამხარებას ექიმები ცდილობენ. მას შემდეგ რაც იგი ბადრაგმა სასამართლოში მიიყვანა შეუძლოდ გახდა. ამიტომ სასწრაფო გამოიძახეს.

„ჯანმრთელობის პრობლემები აქვს. ამიტომ პერიოდულად ცუდად ხდება ხოლმე. სასწრაფო ბადრაგმა თვითონ გამოიძახა. ჩვენ შიგნით არ გვიშვებენ. იმედია უკეთ გახდება“, – ამბობს ბესიკ.ხ–ს ადვოკატი ნუგზარ სამარჯიშვილი და ამატებს, რომ თუ მისი მდგომარეობა არ გაუმჯობესდა, შესაძლოა პროცესი გადაიდოს კიდეც.

დღეს, 8 დეკემბერს პოლიციელებზე თავდასხმაში ბრალდებულების წინა სასამართოს სხდომა 12 საათზე უნდა გამართულიყო. სასამართლო ბესიკ ხ-ს მდგომარეობის გაუმჯობესებას ელოდება.

შეგახსენებთ, რომ ოთხი ახალგაზრდა ახალციხეში, 15 ოქტომბერს ღამით, თამარაშვილის ქუჩაზე პოლიციის თანამშრომელზე თავდასხმის ბრალდებით დააკავეს. მათ პროკურატურა სსკ–ის 353–ე მუხლის მეორე ნაწილით გათვალისწინებული დანაშაულის ჩადენას ედავება. აღნიშნული მუხლი გულისხმობს წინააღმდეგობას, მუქარას ან ძალადობას საზოგადოებრივი წესრიგის დამცველის ან ხელისუფლების სხვა წარმომადგენლის მიმართ და ითვალისწინებს თავისუფლების აღკვეთას 7–დან 11 წლამდე.

[თამუნა უჩიძე, ვარლამ წიკლაური ახალციხე]