ახალციხეში ოთხი პირი პოლიციელზე თავდასხმის ბრალდებით დააკავეს

ახალციხეში მცხოვრები ბესიკ ხ., ნიკოლოზ ლ., ლევან კ. და ირაკლი დ. სამართალდამცველებმა საპატრულო პოლიციის ოცმეთაურზე ვაჟა გათაშვილზე თავდასხმისთვის დააკავეს. შემთხვევა თამარაშვილის ქუჩაზე ღამით, დაახლოებით 00:05 საათზე მოხდა.

როგორც ბრალშია მითითებული, ოთხივე მათგანი ქუჩაში ნასვამ მდგომარეობაში მიდიოდა. მათ საპატრულო პოლიციის ეკიპაჟს ხელი დაუქნიეს და მანქანის გაჩერება სთხოვეს. ლევან კ–მ სამართალდამცავებს უთხრა, რომ მისი მეგობარი ბესიკ ხ. შეუძლოდ იყო და საავადმყოფოში წაეყვანათ: „დაუკითხავად მოთავსდნენ მანქანის უკანა სავარძელში და ყვირილით მოითხოვეს, რომ საავამდყოფოში წაეყვანათ. მომხდარმა პატრულის თანამშრომლების დაინტერესება გამოიწვია. ამის გამო კი მანქანაში მყოფები აგრესიულები გახდნენ, უცენზურო სიტყვებით აგინებდნენ“.

ასევე ბრალიდან ირკვევა, რომ ამის შემდეგ საპატრულო პოლიციის თანამშრომლები მანქანიდან გადმოვიდნენ და ახალგაზრდების გადმოყვანასაც შეეცადნენ. ამ დროს შემთხვევის ადგილზე პოლიციის სხვა თანამშრომლებიც მივიდნენ. დაიწყო შეხლა შემოხლა და როგორც ბრალდების მხარე მიუთითებს, ნასვამებმა სამართალდამცავებს სხეულის დაზიანებები, ასევე სიტყვიერი შეურაცხყოფა მიაყენეს.

დაკავებულებს ბრალი სსკ–ის 353–ე პრიმა მუხლის მეორე ნაწილით გათვალისწინებული დანაშაულის ჩადენაში ედებათ. ბრალდებულები ბრალს არ აღიარებენ. აღკვეთის ღონისძიების შეფარდებაზე ახალციხის რაიონული სასამართლო დღეს, 17 ოქტომბერს, იმსჯელებს.

[თამუნა უჩიძე, ახალციხე]