კობა გორგოძე 'გირჩთან' რჩება და მაჟორიტარი აღარ იქნება

„გადავწყვიტე ჩემს გუნდთან ერთად დავრჩე და მოვხსნა ჩემი კანდიდატურა. ექვს საათამდე მოვასწარი და ცესკოს განცხადებით მივმარეთე“,-განაცხადა კობა გორგოძემ.

მისი თქმით, „გირჩთან“ ერთად პარტიულ საქმიანობას გააგრძელებს და თვითმართველობის არჩევნებისთვის დაიწყებს მზადებას. ამ პერიოდის განმავლობაში იმუშავებს „გირჩის“ ახალციხის რაიონული ორგანიზაციაც.

დღეს, 28 სექტემბერს კანდიდატურის მოხსნის თაობაზე ცენტარლურ სააჩევნო კომისიას, „გირჩის“ კიდევ 15 წევრმა მიმართა. ისინი „პაატა ბურჭულაძე-სახელმწიფო ხალხისათვის“ დეპუტატობის კანდიდატები იყვნენ საქართველოს სხვადასხვა საარჩევნო ოლქებში.

„გირჩის“ არცერთი წევრი არ დარჩენილა ბურჭულაძის პარტიაში, ყველა წამოვიდა და კანდიდატურებიც მოიხსნეს“, - განაცხადა კობა გორგოძემ.

შეგახსენებთ, რომ გუშინ, 27 სექტემბერს „გირჩმა“ საარჩევნო ბლოკი „პაატა ბურჭულაძე-სახელმწიფო ხალხისთვის“ დატოვა და განაცხადა, რომ არჩევნებში მონაწილეობას აღარ მიიღებს.

ამ მოვლენებთან დაკავშირებით, პაატა ბურჭულაძის პარტია ხვალ ადიგენში ბრიფინგს გამართავს. ამის შეასახებ „სამხრეთის კარიბჭეს“ ადიგენის შტაბის წარმომადგენელმა აცნობა.

[ლუბა გიორგაძე, ახალციხე]