სამცხე–ჯავახეთში ხე–ტყის უკანონო ჭრისა და ტრანსპორტირების ფაქტები გამოავლინეს

მთავარი → სამართალი » შემთხვევა 26.11.2015

გარემოსდაცვითი ზედამხედველობის დეპარტამენტისა და ეროვნული სატყეო სააგენტოს სამცხე–ჯავახეთის სატყეო სამსახურის თანამშრომლებმა ბორჯომის, ახალციხისა და ადიგენის მუნიციპალიტეტებში ხე–ტყის უკანონო ჭრისა და ტრანსპორტირების ფაქტები გამოავლინეს.

სამცხე–ჯავახეთში ხე–ტყის უკანონო ჭრისა და ტრანსპორტირების ფაქტები გამოავლინეს

გარემოსდაცვითი ზედამხედველობის დეპარტამენტის სამცხე-ჯავახეთის სამმართველოს თანამშრომლებმა ბორჯომის მუნიციპალიტეტის დაბა ახალდაბაში გადამოწმების მიზნით მიკროავტობუსი გააჩერეს, რომლის ძარაზეც განთავსებული იყო უკანონოდ მოპოვებული მრგვალი მორი.

სამართალდარღვევის ფაქტი დაფიქსირდა ახალციხის მუნიციპალიტეტის სოფელ აწყურშიც, სადაც სატვირთო ავტომანქანის ძარაზე ნანახი იქნა უკანონოდ მოპოვებული საშეშე მერქანი. ასევე უკანონოდ მოპოვებული მრგვალი მორი აღმოაჩინეს ადიგენის მუნიციპალიტეტის სოფელ უდეში რეგისტრირებულ სახერხ-საამქროს ტერიტორიაზე, სატვირთო ავტომანქანის ძარაზე.

აღნიშნული ავტომანქანები დაილუქა და გადაყვანილ იქნა ფინანსთა სამინისტროს მომსახურების სააგენტოში.

გარდა აღნიშნული სამართალდარღვევის ფაქტებისა ეროვნული სატყეო სააგენტოს სამცე-ჯავახეთის სატყეო სამსახურის თანამშრომლებმა, ახალციხის მუნიციპალიტეტის მიმდებარედ უკანონო ჭრა გამოავლინეს. სააგენტოს ინფორმაციით, მოჭრილია 3 კუმბამეტრამდე ფიჭვის ჯიშის ხე-ტყე.

სამცხე–ჯავახეთის სატყეო სამსხურის თანამშრომლების მიერ მასალები შემდგომი რეაგირებისთვის გადაიგზავნა შესაბამის უწყებაში.

[თამარ თოთაძე, ახალციხე]