ბორჯომსა და ადიგენში ხე–ტყით უკანონოდ სარგებლობის რამდენიმე ფაქტი გამოავლინეს

მთავარი → სამართალი » შემთხვევა 17.09.2015

გარემოსდაცვითი ზედამხედველობის დეპარტამენტის სამცხე–ჯავახეთის სამმართველოს თანამშრომლებმა ბორჯომისა და ადიგენის მუნიციპალიტეტებში ხე–ტყით უკანონოდ სარგებლობის რამდენიმე ფაქტი და უკანონოდ მოქმედი სახერხი–საამქრო აღმოაჩინეს.

ბორჯომსა და ადიგენში ხე–ტყით უკანონოდ სარგებლობის რამდენიმე ფაქტი გამოავლინეს

გარემოსდაცვითი ზედამხედველობის დეპარტამენტის ინფორმაციით, სამცხე-ჯავახეთის სამმართველოს თანამშრომლებმა ბორჯომის მუნიციპალიტეტის სოფელ ყვიბისიში, ტყისბუდეში უკანონოდ მოპოვებული წიწვოვანი სახეობის მრგვალი მორი გამოავლინეს.

ბორჯომის მუნიციპალიტეტის სოფელ ანდეზიტში კი ხე-ტყის უკანონო ტრანსპორტირეის ფაქტი გამოავლინეს. კერძოდ, მოქალაქის ავტომობილის ძარზე განთავსებული იყო უკანონოდ მოპოვებული წიფელის სახეობის 6 კუბური მეტრი ხე-ტყე.

უკნანოდ მოქმედი სახერხი საამქრო აღმოაჩინეს ბორჯომის მუნიციპალიტეტის სოფელ ყვიბისში. გარემოსდაცვითი ზედამხედველობის დეპარტამენტის ინფორმაციით, სამართალდამრღვევს უკანონო სახერხი საამქრო საცხოვრებელი სახლის ეზოში ჰქონდა გამართული. ადგილზე ასევე აღმოჩენილი იქნა პირველადი გადამუშავების პროდუქტი – ფიცარი. სამცხე–ჯავახეთის სამმართველოს თანამშრომლების მიერ განხორციელდა აღნიშნული სახერხი დანადგარის დემონტაჟი.

ასევე, ადიგენის მუნიციპალიტეტის სოფელ ენთელში გარემოსდაცვითი ზედამხედველობის დეპარტამენტის სამცხე–ჯავახეთის სამმართველოს თანამშრომლებმა გადამოწმების მიზნით სატვირთო ავტომანქანა გააჩერეს. დადგინდა, რომ სატრანსპორტო საშუალების ძარაზე განთავსებული იყო უკანონოდ მოპოვებული ნაძვის სახეობის სხვადასხვა ზომაზე დაჭრილი ხე-ტყე. აღნიშნული ავტომანქანა დალუქული და გადაყვანილი იქნა საფინანსო სააგენტოში.

ოთხივე სამართალდარღვევის ფაქტზე შესაბამისი აქტებია შედგენილი.

[თამარ თოთაძე, ახალციხე]