‘ნუ გაათხოვებ’ – ახალციხეში ნაადრევი ქორწინება გააპროტესტეს

აქციაში, რომელიც ახალციხის ცენტრალურ პარკში გაიმართა, ახალციხის არასამთავრობო და ახალგაზრდული ორგანიზაციებისა და ახალციხის გენდერის მედიაცენტრის წარმომადგენლები მონაწილეობდნენ.

აქციის მონაწილეები პარკში გამვლელ მოქალაქეებს ნაადრევი ქორწინების წინააღმდეგ დაწყებულ კამპანიაზე ესაუბრებოდნენ. აქციაზევე წაიკითხეს კამპანის ორგანიზატორის, ქალთა მოძრაობის მიერ შემუშავებული მიმართვა.

„18 წლამდე ქორწინებაა არ არის ქორწინება, ეს სექსუალური ძალადობაა. მოვუწოდებთ მშობლებს შეეცადონ საკუთარ შვილებს მისცენ განათლება, არ გაათხოვონ ნაადრევად, რადგან შემდეგ არ მოუწიოთ პრობლემების წინაშე დადგომა“, – ამბობს ანა მურადაშვილი.

ახალციხის ცენტრალურ პარკში ნაადრევი ქორწინების წინააღმდეგ გამართული აქცია ერთ საათს გაგრძელდა.

შეგახსენებთ, რომ მსგავსი აქცია, ქალთა მოძრაობის ორგანიზებით, მთელი საქართველოს მასშტაბით გაიმართა. საქართველოს დედაქალაქში, თბილისში, გოგონათა ნაადრევ ქორწინებას საღამოს, 20:00 საათზე, პერფორმანსით გააპროტესტებენ.

„საქართველოში, ყოველ დღე 4 არასრულწლოვანი გოგონა ხდება დედა. საგანგაშოა სტატისტიკა, რომლის მიხედვით, 2011 წლიდან 2013 წლის იანვრამდე, 7367-მა გოგონამ მე-7-9 კლასში განათლების მიღება შეწყვიტა, დიდწილად ადრეული ქორწინების და მასთან დაკავშირებული პრობლემების გამო.

საქართველოს კანონმდებლობით 18 წელი არის ქორწინებისთვის დასაშვები ასაკი.

„სიტყვა „ქორწინება“ შეუფერებელია იმ არასრულწლოვანი გოგონების მდგომარეობის აღსანიშნავად, რომლებიც მშობლებმა ეკონომიკური გაჭირვების თუ ტრადიციების გამო, ფაქტობრივად სახლიდან გააგდეს, გაათხოვეს, გაასხვისეს ნივთივით.“ - აცხადებენ ქალთა მოძრაობის წევრები.

ქალთა მოძრაობა სახელმწიფოსგან კანონის გამკაცრებასა და მსგავს ფაქტებზე მყისიერ რეაგირებას მოითხოვს.

[ვარლამ წიკლაური, ახალციხე]