მაღალი ქულების გამო დაკარგული დახმარება

ათი წელია ქეთევან ყულჯანიშვილი სოფელ ბენარაში მარტო ცხოვრობს. ჯანმრთელობის პრობლემების გამო მიწის ნაკვეთებს ვეღარ ამუშავებს. მისი ერთადერთი შემოსავალი პენსიაა, რომელიც,როგორც თვითონ ამბობს, წამლების საყიდლადაც არ ჰყოფნის.

წლებია მისი ორი შვილი, თავიანთი ოჯახებით, ქალაქ რუსთავში ცხოვრობს.
”თავიანთი თავი უჭირთ, 200 ლარიან ხელფასით ცხოპვრობენ, მე როგორ დამეხმარებიან”, - ამბობს იგი.

სოციალური სუბსიდიების სააგენტოს ადიგენის განყოფილებას დახმარება არაერთხელ სთხოვა. თუმცა, უშედეგოდ, მაღალი ქულების დაგროვების გამო დახმარება ვერ მიიღო.



”პირველად, 2006 წელს, განცხადება დავწერე. სოციალურმა აგენტმა შეამოწმა სახლი და 73,000 ქულა მომივიდა. მას შემდეგ, სამჯერ კიდევ მოვიდნენ. მიუხედავად იმისა, რომ სახლში უკეთესობისკენ არაფერი შეცვლილა, უფრო მეტი ქულები დამიწერეს”,- ამბობს იგი.

ქეთევან ყულჯანიშვილი ორსართულიანი სახლის პირველ სართულზე ცხოვრობს. სახლი მცოცავ მიწაზე დგას და ავარიულია. დიასახლისი ამბობს, რომ შესაძლოა შენობა ნებისმიერ წუთს ჩამოინგრეს. ყველა ოთახს უკვე ბზარები აქვს გაჩენილი.

მარტოხელა ქალბატონს უკვირს საიდან იღებს მაღალ ქულებს. სახლში მხოლოდ ძველი გაზი და მაცივარი დგას, ესეც იმის გამო, რომ ოთახები არ დაცარიელდეს.

”ძველი გაზი და მაცივარი ოთახის შეცავსებად დევს, სხვა არაფერში გამოდგება. ახალი არაფერი მაქვს, ყველაფრის მიუხედავად, ამ წელს 90,320 ქულა მომივიდა”, - უკვირს დიასახლისს.

74 წლის პენსიონერმა დასახმარებლად ”სამხრეთის კარიბჭესაც” მომართა.

”მეზობელმა მომცა თქვენი გაზეთი, გამიხარდა სიმართლე ვიპოვე-მეთქი და მაშინვე დაგირეკეთ. ახლა თქვენი იმედი მაქვს, იქნებ დამეხმაროთ”,-ამბობს იგი.

ყველაზე მეტად ყულჯანიშვილს ზამთარში უჭირს. იმის გამო, რომ ფული არ აქვს, ზამთრისთვის შეშის მომარაგებას ვერ ახერხებს. გარდა ამისა, პრობლემაა სახლის დაზიანებული სახურავიც. წვიმის დროს სახლში ისევე წვიმს, როგორც გარეთ. დაბზარულ და გადახრილ ოთახებში ჩამოსულ წვიმის წყალს ვედრები და თასები აქვს შედგმული.



სახლის შესაკეთებლად დახმარების თხოვნით ერთი წლის წინ ადიგენის მუნიციპალიტეტის გამგეობას მიმართა.

”გამგებელმა სიმონ პარუნაშვილმა მხოლოდ ტყიდან მასალის გამოტანის ნებართვა მომცა. ტყეში წასვლა, რომ შემძლებოდა, დასახმარებლად გამგებელთან კი არ წავიდოდი”, - ამბობს იგი.

ქეთევან ყულჯანიშვილს ერთი სული საქონელი და სამი ქათამი ჰყავს. იგი არ გამორიცხავს, რომ მაღალი ქულები შესაძლოა ამიტომ მოსდის.

”ჩემთან მოსულ სოციალურ აგენტს ვკითხე, პირუტყვი თუ იქონიებდა გავლენას ქულების რაოდენობაზე და მითხრა, რომ თუ ერთი ძროხა მეყოლებოდა, ამას გადამწყვეტი მნიშვნელობა არ ექნებოდა”,- ამბობს დიასახლისი.

მან დასახმარებლად სოციალური სამსახურის ცხელ ხაზზეც დარეკა, თუმცა ვერც ამ შემთხვევაში დაეხმარნენ: ”დავრეკე, მაგრამ მითხრეს ჩვენი კომპეტენცია არ არის და ვერ დაგეხმარებითო. ერთადერთი იმედი დამრჩა, იქნებ თქვენი გაზეთის დახმარებით შევძლო და დახმარება დამინიშნონ”.

სოციალური სუბსიდიების სააგენტოს ადიგენის განყოფილების უფროსს პეტრე აფრიამაშვილს ”სამხრეთის კარიბჭემ” სამსახურში 24 ოქტომბერს მიაკითხა. აფრიამაშვილი სამსახურში არ დაგვხვდა. სატელოფონო საუბარში კი განგვიცხადა, რომ ვიდრე სათაო ოფისში არ დარეკავდა, კომენტარს ვერ გააკეთებდა. მომდევნო ზარზე კი გვიპასუხა, რომ იმ შემთხვევაში თუ სააგენტოს დასახმარებლად თავად ყულჯანიშვილი, ან, მისი სახელით გაზეთი მივმართავთ, შესაძლოა კომისია ხელახლა დაინიშნოს.

”რატომ მოსდის მაღალი ქულები, არ ვიცი, აგენტი იმას იწერს, რასაც ოჯახის პატრონი ეუბნება. შემდეგ ეს მონაცემები თბილისში იგზავნება და იქ ჯამდება. თუ დაწერთ განცხადებას, ან თუ თავად ხელახლა მოგვმართავს და ჩვენი სამსახური საჭიროდ მიიჩნევს, შეიქმნება მონიტორინგის ჯგუფი და ამ ოჯახს თავიდან გადაამოწმებენ”, - განაცხადა პეტრე აფრიამაშვილმა.


[თინათინ ზაზაძე, ადიგენი]