ახალციხეში ევროკავშირის ბაზრის ათვისების შესაძლებლობებზე იმსჯელეს

არასამთავრობო ორგანიზაცია „კვლევითი ჟურნალისტიკისა და ადვოკატირების ცენტრის“ ანალიტიკოსები ახალციხეში ადგილობრივ ფერმერებს შეხვდნენ და ევროკავშირის ბაზრის ათვისების შესაძლებლობებზე ესაუბრნენ.

„ჩვენი მიზანი იყო ადგილობრივი ფერმერებისთვის ევროკავშირის ბაზრის პერსპექტივები გაგვეცნო და ამავე დროს მოგვეთხრო იმ წარმატებული მაგალითების შესახებ, რომელიც საქართველოს უკვე აქვს. ევროკავშირის ბაზარზე გასვლა სულაც არ არის მიუღწეველი და არარეალური, ჩვენ კონკრეტული მაგალითები უკვე გვაქვს და ნებისმიერ მეწარმეს, მონდომების შემთხვევაში, ადვილად შეუძლია ამ ბაზარზე გასვლა“, – ამბობს „კვლევითი ჟურნალისტიკის და ადვოკატირების ცენტრის“ ანალიტიკოსი მანანა ვარდიაშვილი.

მისივე თქმით, საქართველო ევროკავშირის ბაზარზე თხილის ყველაზე მსხვილი ექსპორტიორების ხუთეულშია. 2011 წელს კი ამავე ბაზარზე მეორე ადგილზეც კი იყო გატეხილი თხილის გულის რაოდენობის მიხედვით.

„გვაქვს სხვა წარმატებული მაგალითებიც, ქართული ღვინო გადის ძალიან წარმატებით, იაგო ბიტარიშვილის „ჩარდახი“, რომელიც ცნობილ ღვინის ბარებსა და რესტორნებში იყიდება. წელს წარმატებული იყო კივი, რომელიც გერმანიაში ცნობილ სავაჭრო ცენტრში იყიდება. თაფლი არის პოტენციური საექსპორტო პროდუქტი, ორი წელია თაფლის სინჯები იგზავნება შესამოწმებლად, ალბათ წელსაც გააგზავნიან, ამის შემდეგ ევროკავშირის მისია დადებს დასკვნას და ვფიქრობთ, რომ 2017 წლიდან თაფლიც გავა ევროკავშირის ბაზარზე და საკმაოდ დიდ კონკურენციას გაუწევს იქ დღეს დამკვიდრებულ თაფლს“, – ამბობს მანანა ვარდიაშვილი.



[თამარ თოთაძე, ახალციხე]