ქართული თაფლის გზა ევროპისაკენ [Video]

უკვე ერთი წელია რაც ევროკავშირმა საქართველო იმ ქვეყნების ჩამონათვალში შეიყვანა, რომლებიც მალე ევრობაზარზე თაფლს გაიტანენ. თუმცა, ჯერ ქართველ ფერმერებს გარკვეული ვალდებულებები აქვთ შესასრულებელი. მათ შორის ერთ–ერთი თაფლის ხარისხის შემოწმებაა, ამისთვის ევროკავშირის მხარდაჭერით საქართველოში უკვე 11 ლაბორატორია ფუნქციონირებს.

საქართველოს სოფლის მეურნეობის ლაბორატორიაში ამ ეტაპზე თაფლს ორი მიმართულებით – უვნებლობასა და ხარისხზე იკვლევენ. ლაბორატორიის დირექტორი ირაკლი გულედანი ამბობს, რომ თაფლის შემოწმებაზე მოთხოვნა ნაკლებია. მისი თქმით, მიმდინარე წელს, ლაბორატორიამ სულ რაღაც ოცამდე თაფლის სინჯი გამოიკვლია. მიუხედავად ამისა, ისინი მზადარიან, პროდუქტის ევრობაზარზე გასატანად კვლევის სფეროები კიდევ უფრო გააუმჯობესონ.



ქართული პროტუქტის და მათ შორის თაფლის ევროპის ბაზარზე გატანა ასოცირების შეთანხმების ეკონომიკური ნაწილია.
,, Enpard” - ის საინფორმაციო ხელმძღვანელი თამარ ხუნწარია გვიყვება, რომ სხვა პროდუქტებისაგან განსხვავებით თაფლმა სტანდარტები ვერ დააკმაყოფილა და ვერც ევროპულ ბაზარზე მოხვდა.



იმისათვის, რომ ქართული თაფლი ევროპის ბაზარზე მოხვდეს, ერთ–ერთი მოთხოვნა მისი რაოდენობის ზრდაა. სწორედ ამიტომ, ევროკავშირის მხარდაჭერით, საქართველოს სოფლის მეურნეობის სამინისტრომ სასოფლო კოოპერატივები შექმნა. საქართველოში ასეთი უკვე ათობით კოოპერატივი ფუნქციონირებს.

მათ შორის ერთ–ერთია კოოპერატივი „ქართული ნექტარი“, რომლის ერთ–ერთი დამფუძნებელი ახალციხეში, სოფელ მუსხში მცხოვრები ზაზა ივანიძეა. მისმა თაფლმა ამერიკასა და ევროპის ქვეყნებში, სხვადასხვა გამოფენაზე მოწონება უკვე დაიმსახურა, ახლა კი ყველა სტანდარტის დაცვას ცდილობს იმისათვის, რომ ევროპის ბაზრზეც მოხვდეს.

„მესმის, რომ ევროპულ ბაზარზე თავის დამკვიდრება მარტივი არ არის, ვცდილობ ყველაფერი გავაკეთო სტანდარტების დასაკმაყოფილებლად. პირველი რაც იყო ძველი თაფლის სკები ახლით ჩავანაცვლე და თაფლის დასაწურად თანამედროვე დანადგარები შევიძინე. დიდი იმედი მაქვს, მალე ჩემი თაფლი ყველანაირ სტანდარტს დააკმაყოფილებს“,– ამბობს ფერმერი ზაზა ივანიძე.



[ლუბა გიორგაძე, ახალციხე]