რა იცვლება თაფლის წარმოებაში

შეხვედრას, რომელსაც 30 მეფუკტრე ესწრებოდა, სოფლის მეურნეობის სამინისტროს სამცხე–ჯავახეთის რეგიონული სამმართველოს უფროსი ნანა ზუბაშვილი უძღვებოდა. მისი თქმით, ევროკავშირთან ასოცირების ხელშკრულების გაფორმების შემდეგ თაფლის წარმოების სტანდარტები შეიცვალა: „ასევე, საუბარია შეფუთვა–რეალიზაციაზე და იმაზე თუ როგორ უნდა მიიღონ მათ ISO და GLOBAL G.A.P. სერთიფიკატები, რაც ევროკავშირის ბაზარზე ფერმერებს პროდუქტის გატანას გაუიოლებს“.

დაბინძურებული ჰაერის გამო, მეფუტკრეებს ფუტკარი ხშირად ეხოცებათ, ამიტომ მათ ფუტკრის პესტიციდების გამოყენება უწევთ. ეს კი შემდეგ თაფლში ხვდება და პროდუქტს აფუჭებს. დღევანდელ შეხვედრაზე მეფუტკრეებს სწორედ პესტიციდების სწორად გამოყენებისა და მისი მავნებლობის შესახებ ესაუბრნენ.

„შარშან 120 ოჯახი ფუტკარი მყავდა, ახლა 40–ზე ჩამოვედი, ჩემი წინაპრებიც მეფუტკრეები იყვნენ, მაშინ ფუტკრის ღალიანობა მაისში იწყებოდა, ახლა ივნისში ძლივს არის, ამის მიზეზი დაავადებებია, ვწამლობთ იმიტომ, რომ არ დაიხოცონ, მაგრამ თაფლიც ფუჭდება. აუცილებელია, რომ ჩვენთანაც ის სტანდარტები დაინერგოს, რაც ევროპაშია, სხვანაირად თაფლს გასაყიდად ვერ გავიტანთ“, – ამბობს მეფუტკრე თენგიზ მჭედლიშვილი, რომელიც ასპინძიდან, სოფელ საროდანაა.

თაფლის წარმოებაში ახალი თანამედროვე სტანდარტების დანერგვა რომ აუცილებელია ამაზე მეფუტკრე გია ლეკიშვილიც საუბრობს: „ურაველში 19 ძირი ფუტკარი მყავს, თუ თანამედროვე მოთხოვნებს ფეხი არ ავუწყეთ, ისე ჩვენი საქმიანობის განვითარება გაგვიჭირდება“.

მეფუტკრეები სტანდარტების გაუმჯობესების შემთხვევაში თაფლს ევროკავშირის ბაზარზე იმავე პირობებით გაიტანენ, რა პირობებითაც დღეს ევროკავშირის ქვეყნები სარგებლობენ.

[ავთო ინასარიძე, ახალციხე]