ადიგენში გორგულის გზას ვერა, მაგრამ ხიდებს შეაკეთებენ

სოფელ გორგულში ბეტონის გზის რეაბილიტაცია ვერ ესწრება. ამიტომ ამ თანხით, ადიგენის მუნიციპალიტეტის საკრებულოს გადაწყვეტილებით, იმ ხიდებს შეაკეთებენ, რომლებიც საგზაო დეპარტამენტის ბალანსზეა. ამისთვის, გამგეობას აღნიშნული უწყებიდან მხოლოდ ნებართვა დასჭირდება.

„დაახლოებით 105 ათასი ლარი იყო გათვალისწინებული გორგულის გზის საფარის მოსაწყობად. ექსპერტებთან გავიარეთ კონსულტაციები და გვითხრეს, რომ ამ ეტაპისტთვის ბეტონის საფარის მოწყობა სარისკოა, რადგან შესაძლოა, მომავალში აცივდეს და ის მინარევები თუ შენაერთები, რასაც დაუმატებენ ბეტონს სიცივეს ვეღარ გაუძლოს. ამიტომ იმ მუჯხლიდან 75 ათასი ლარი მოვხსენით და ხიდებში გადმოვიტანეთ“, – განმარტა საკრებულოს სხდომაზე იმედა მღებრიშვილმა და დაამატა, რომ ადგილობრივმა თვიმმთართველობამ საგზაო დეპარტამენტს ხიდების მდგომარეობის შესახებ არა ერთხელ მიწერა, თუმცა საბოლოოდ საქმე არ გაკეთდა, ამიტომ გადაწყვიტეს, აღნიშნულ უწყებას ამ ხიდების შეკეთებისთვის ნებართვა სთხოვონ.

საკრებულოს დეპუტატი „ნაციონალური მოძრაობიდან“ რატი ტატალაშვილი აცხადებს, რომ ეს გადაწყვეტილება საბიუჯეტო სახსრების ხარჯვასთან შეუთავსებლობაში მოდის: „სახელმწიფოს ბალანსზე არსებული ხიდები სახელმწიფო ბიუჯეტით უნდა შეკეთდეს. არ აქვთ უფლება თანხა მიმართონ იმ ობიექტზე პრობლემის აღმოსაფხვრელად, რომელიც მათ ბალანსზე არაა“.

ტატალაშვილს ეთანხმება დეპუტატი პარტია „ბურჯანაძე დემოკრატებიდან“ მალხაზ ბოჩიკაშვილი: „გორგულს უფრო სჭირდება ახლა გზის გაკეთება, ვიდრე სახელმწიფო ბალანსზე არსებულ ხიდებს“.

კითხვაზე, თუ თანხა იყო გათვალისიწნებული და აქამდე რატომ ვერ მოხერხდა გორგულში გზის გაკეთება, საკრებულოს თავმჯდომარე გვპასუხობს: „ფართომასშტაბიანი სამუშაოები გვაქვს ადიგენში გაშლილი და ყველა პრობლემა ეტაპობრივად გვარდება. ეს თანხა სხვადასხვა ტენდერებიდან გვქონდა დაზოგილი და ერთი მუხლიდან ახლა მეორეში გადავიტანეთ“.

სავარაუდოდ, ადგილობრივი თვითმმართველობა ამ თანხას გორგულისა და ზარზმასთან არსებული ხიდების შესაკეთებლად გამოიყენებს. ორივე ხიდი ავარიული და დროებით შეკეთებულია.

ადიგენის საკრებულოს დეპუტატი ლევან ლობჯანიძე აცხადებს, რომ 75 ათასი ლარი ბოლომდე შესაკეთებლად არა თუ ხიდების, არამედ ერთი ხიდის სრულ რეაბილიტაციასაც კი არ ეყოფა.

[თამუნა უჩიძე, ადიგენი]