ახალციხეში საძოვრებს ყირიმ–კონგოს საწინააღმდეგო პრეპარატით წამლავენ

ახალციხის მუნციპალიტეტში მიმდინარე წელს ყირიმ–კონგოს ცხელებით სამი ადამიანი დაავადდა, აქედან ბოლო შემთხვევა სოფელ ივლიტაში დაფიქსირდა. დაავადებულმა ტკიპამ ახალგაზრდა მამაკაცი დაავადა. შემთხვევა რამდენიმე კვირის წინ მოხდა. მამაკაცი მკურნალობის შემდეგ გამოჯანმრთელდა. დანარჩენი ორი შემთხვევა ვალესა და მინაძეში დაფიქსირდა.

სურსათის უვნებლობის სამსახურის სამცხე–ჯავახეთის რეგიონული სამსახურის უფროსის ლია ბექაურის განმარტებით, იმ ტერიტორიებზე, სადაც პირუტყვი ბალახს ძოვს, სადეზინფექციო სამუშაოები მიმდინარეობს.

„ცხოველები და მათი სადგომები დავამუშავეთ ტკიპის საწინააღმდეგოდ. ამ ეტაპზე ჩამოსულია ჩვენი სამსახურის მობილური ჯგუფი და სპეციალური მანქანით ვწამლავთ საძოვრებს“, – ამბობს ლია ბექაური.

მისი თქმით, მიმდინარე წელს სამცხე–ჯავახეთში ყირიმ–კონგოს ცხელების ეს პირველი შემთხვევაა.

შეგახსენებთ, რომ ყირიმ–კონგოს ცხელება ასპინძაში 2013 წელს დაფიქსირდა. მაშინ 24 წლის მამაკაცი და 27 წლის ორსული დაავადდა.

ყირიმ-კონგოს ანუ ჰემორაგიული ცხელების ვირუსი ტკიპებსა და სხვა ფეხსახსრიანებში ვლინდება. ადამიანზე კი იმ შემთხვევაში გადადის, თუ მას ვირუსის გადამტანმა ტკიპამ უკბინა. ადამიანიდან ადამიანზე ეს ვირუსი არ გადადის. ჰემორაგიული ცხელება ყირიმსა და კონგოში გასული წლის 40-იან წლებში დაფიქსირდა. სწორედ აქედან გამომდინარე მას ყირიმ-კონგოს ცხელება უწოდეს. საქართველოში ამ ვირუსის მატარებელი ტკიპები 80-იან წლებში აღმოაჩინეს. საქართველოში ეს ვირუსი პირველად 2009 წელს გამოვლინდა.

დაინფიცირების ალბათობა მაღალია, დაავადების 40 % კი ლეტალურად მთავრდება.

[თინათინ ზაზაძე, ახალციხე]