ყირიმ-კონგოს ცხელებით ახალქალაქში 23 წლის ბიჭი გარდაიცვალა

23 წლის ინფიცირებული ახალქალაქიდან თბილისში ბოჭორიშვილის კლინიკაში გადაიყვანეს, თუმცა მისი გადარჩენა ვერ მოხერხდა. ახლობლები ვარაუდობენ, რომ მას დაავადება საქონლიდან, ტკიპის ნაკბენით განუვითარდა.

„ანალიზებით დადასტურდა, რომ ნამდვილად ყირიმ-კონგოს ცხელება იყო, სავარაუდოდ, ტკიპას ნაკბენიდან გადაედო“.

დავისურებული ახალგაზრდა პირველად ახალქალაქის საავადმყოფოში შეიყვანეს: „მძიმე მდგომარეობა ჰქონდა. ჩვენთან არ უმკურნალია. ჩვენ დავსვით დიაგნოზი, რომ ყირიმ-კონგოს ცხელება იყო. გამოვიძახეთ რეანომობილი და გადაიყვანეს თბილისში“, - ამბობს ახალქალაქის საავადმყოფოს დირექტორი ალექსანდრე თოროსიანი.

ახალგაზრდა ბოჭორიშვილის კლინიკაში 23 აპრილს შეიყვანეს.

სამცხე-ჯავახეთში ყირიმ-კონგოს ცხელების წელს უკვე მეორე შემთხვევა. ინფექციით უკვე ერთი კვირაა ბოჭორიშვილის კლინიკაში მკურნალობს ადიგენში მცხოვრები 56 წლის მამაკაცი.

ყირიმ-კონგოს ცხელება მძიმე ვირუსული ინფექციაა, რომელიც ადამიანებზე ტკიპის ნაკბენით ვრცელდება. ტკიპა, დაავადებულ ცხოველზე ან მღრნელზე კბენის დროს ინფიცირდება. თუ ვირუსის მატარებელმა ტკიპამ შემდეგ ადამიანს უკბინა, იგი სავალალო შედეგებს იწვევს.

დაავადებათა კონტროლის ეროვნული ცენტრის ინფორმაციით, ამ დაავადების გავრცელების მხრივ სამცხე-ჯავახეთი ერთ-ერთი ენდემური რეგიონია.

2018-2019 წლებში სამცხე-ჯავახეთში ყირიმ-კონგოს ვირუსით ადამიანთა დაავადების ცხრა შემთხვევა დაფიქსირდა.

ამავე თემაზე ნახეთ:

რატომ უნდა ვერიდოთ ტკიპებს

ექიმი გვირჩევს: ყირიმ–კონგოს ჰემორაგიული ცხელება

[თაკო ფეიქრიშვილი, ახალქალაქი]