ახალციხეში ყირიმ-კონგოთი დაავადებული ახალგაზრდა გამოჯანმრთელდა

გამოჯანმრთელებული პაციენტი საავადმყოფოდან გუშინ, 29 ივნისს გაეწერა. ახალციხის ჯანდაცვის ცენტრის ეპიდემიოლოგის ქეთევან ჯინჭველაძის თქმით, ახალგაზრდა კლინიკაში 12 ივნისიდან მკურნალობდა.

დღეს, 30 ივნისს თბილისის ინფექციური საავადმყოფოს დირექტორმა მარინა ეზუგბაიამ განაცხადა, რომ მიმდინარე წელს ქვეყანაში ყირიმ–კონგოს 10 შემთხვევა გამოვლინდა.

აქედან ერთი ახალქალაქში დაფიქსირდა, რომელიც პაციენტის გარდაცვალებით დასრულდა, ყირიმ–კონგოს ჰემორაგიული ცხელება გამოუვლიდა სამცხე–ჯავახეთში მცხოვრებ კიდევ ოთხ პირს, აქედან ერთი ადიგენიდან, სოფელ არლიდანაა, ხოლო სამი ახალციხის მუნიციპალიტეტის სოფელ ივლიტიდან.

ყირიმ-კონგოს ჰემორაგიული ცხელება ინფექციური დაავადებაა, რომელიც ვრცელდება: დაავადებული ტკიპის მიერ ადამიანის დაკბენისას; დაავადებული ადამიანის სისხლთან შეხებისას; ან დაავადებული ცხოველის სისხლთან შეხებისას.

„დაავადება მიმდინარეობს ცხელებით, კუნთების, თავის, მუცლის ტკივილით, გულის რევით, გამონაყარით, სისხლჩაქცევებით, სისხლდენით. სისხლში თრომბოციტების რაოდენობის შემცირებით. შესაძლებელია დაავადება მიმდინარეობდეს მსუბუქად, საშუალო სიმძიმით და მძიმედ“.

თუ დაავადებულმა ტკიპამ ადამიანს უკბინა, ეს სიმპტომები მას შეიძლება მაშინათვე არ აღმოაჩნდეს, რადგან დაავადების ინკუბაციური პერიოდი 1-9 დღემდეა.

ყირიმ-კონგოს ჰემორაგიული (სისხლდენა) ცხელება იმით არის საყურადღებო, რომ იგი გამოირჩევა სიკვდილიანობის მაღალი მაჩვენებლით. გართულებები ძირითადად მაშინ არის მოსალოდნელი, თუ პაციენტი დაგვიანებით მიმართავს სამედიცინო დაწესებულებას.

დაავადების რისკის ქვეშ იმყოფებიან ის ადამიანები, რომლებიც დასაქმებულები არიან სოფლის მეურნეობაში და ეწევიან მეცხოველეობას.

თუმცა ამასთანავე ნებისმიერი ადამიანი წარმოადგენს რისკის ჯგუფს, თუ მას ბუნებასთან, მინდორთან აქვს შეხება.

რეკომენდაციისთვის, სპეციალისტები გვირჩევენ, მინდორში გასვლამდე გავითვალისწინოთ, რომ უმჯობესია:

▶დამცავი ტანსაცმლის ტარება (გრძელი შარვლები და გრძელი სახელოები);
▶ღია ფერის ტანსაცმლის ტარება, რომელზედაც ადვილად გამოჩნდება ტკიპა;
▶ტანსაცმლის და კანის საფარველის რეგულარული დათვალიერება ტკიპის აღმოჩენის მიზნით და არსებობის შემთხვევაში უსაფრთხო მეთოდებით მოცილება;
▶ტკიპების საწინააღმდეგო ღონისძიებების გატარება ცხოველთა სადგომში;

▶ცხოველის დაკვლის ან მოვლის დროს ხელთათმანებისა და დამცავი ტანსაცმლის ტარება;

▶მოვერიდოთ დაინფიცირებულ ადამიანებთან მჭიდრო კონტაქტს.

▶დაინფიცირებული ადამიანის მოვლისას ჩავიცვათ ხელთათმანები და დამცავი ტანსაცმელი.

▶რეგულარულად დავიბანოთ ხელები.
2020 წელს, სამცხე-ჯავახეთში ყირიმ კონგოს კიდევ ორი შემთხვევაა დაფიქსირებული. ერთი მათგანი, ახალქალაქში სიკვდილიანობით დასრულდა. მეორე კი ადიგენის სოფელ არალში, დაფიქსირდა, 56 წლის მამაკაცი უკვე გამოჯანმრთელდა.

[მარიამ ბარძიმაძე,ახალციხე]