ადიგენში 56 წლის კაცს ყირიმ-კონგოს დიაგნოზი დაუსვეს

56 წლის კაცი ყირიმ-კონგოს ცხელებით თბილისში 2 მაისს გადაიყვანეს. როგორც ადიგენის ჯანდაცვის ცენტრში აცხადებენ, იგი ფერმერია და საქონელთან ხშირი კონტაქტი აქვს. ამ ეტაპზე, პაციენტის მდგომარეობა სტაბილურია.

„კარგად არის, მდგომარეობა სტაბილურია. მეცხოველეობას მისდევდა და როგორც ჩანს, ცხოველისგან გადაუვიდა. ადიგენის საავადმყოფოში არ მიუყვანიათ, პირდაპირ თბილისში წაიყვანეს“, - აცხადებენ ადიგენის ჯანდაცვის ცენტრში.

ყირიმ-კონგოს ცხელება მძიმე ვირუსული ინფექციაა, რომელიც ადამიანებზე ტკიპის ნაკბენით ვრცელდება. ტკიპა, დაავადებულ ცხოველზე ან მღრნელზე კბენის დროს ინფიცირდება. თუ ვირუსის მატარებელმა ტკიპამ შემდეგ ადამიანს უკბინა, იგი სავალალო შედეგებს იწვევს.

დაავადებათა კონტროლის ეროვნული ცენტრის ინფორმაციით, ამ დაავადების გავრცელების მხრივ სამცხე-ჯავახეთი ერთ-ერთი ენდემური რეგიონია.

2018-2019 წლებში სამცხე-ჯავახეთში ყირიმ-კონგოს ვირუსით ადამიანთა დაავადების ცხრა შემთხვევა დაფიქსირდა.

ამავე თემაზე ნახეთ:

რატომ უნდა ვერიდოთ ტკიპებს

ექიმი გვირჩევს: ყირიმ–კონგოს ჰემორაგიული ცხელება

[sknews.ge]