ბორჯომში "ბორჯომობა 2015" აღინიშნება

"ბორჯომობა 2015" – ტრადიციული სახალხო დღესასწაული ბორჯომში წელს 29 აგვისტოს იმართება. ამ დღესთან დაკავშირებით დილიდან სხვადასხვა კულტურული და სპორტული ღონისძიებები იმართება. მოეწყო სოფლის კუთხეების ფანჩატურები, სადაც სტუმრებს ქართული ტრადიციული კერძების დაგემოვნების საშუალება აქვთ, ასევე ხალხური რეწვის ოსტატებისა და ადგილობრივ ხელოვანთა ნამუშევრების გამოფენა–გაყიდვა.

ჯომარდობა მტკვარზე, მკლავჭიდი, ქართული ჭიდაობა, კოსტუმირებული ზღაპრის გმირების მსვლელობა–კარნავალი, თოჯინების თეატრის წარმოდგენა, სიმფონიური ორკესტრის კონცერტი, ადგილობრივი შემოქმედებითი ჯგუფების წარმოდგენა – ეს „ბორჯომობა 2015“ პროგრამის შემადგენელი ნაწილია. ბორჯომის მუნიციპალიტეტის გამგეობის ინიციატივით, 29 აგვისტოს სახალხო დღესასწაულთან დაკავშირებით ცენტრალურ პარკში ატრაქციონები უფასოა. ასევე მთელი დღის განმავლობაში უფასოდ იმოძრავებს მუნიციპალური ტრანსპორტი ქალაქსა და სოფლებში.

სახალხო დღესასწაულს 17:00 საათზე ქართული ესტრადის მომღერლების კონცერტი დაასრულებს. ბორჯომის ცენტრალურ პარკში შეკრებილი მოქალაქეებისთვის დღეს ნატო გელაშვილი, მაკა ზამბახიძე, აჩიკო ნიჟანაძე, ზურა დოიჯაშვილი და ჯგუფი "vanilla cage" იმღერებენ. ასევე კონცერტში მონაწილეობას მიიღებენ ადგილობრივი ცეკვისა და სიმღერის ანსამბლები.

[sknews.ge]