25 აგვისტოს ბორჯომში სახალხო დღესასწაული 'ბორჯომობა – 2018' გაიმართება

12:00–დან 14:00 საათამდე კოსტავას სახელობის ბაღში სპორტული შეჯიბრებები ჩატარდება, დანარჩენი ღონისძიებები კი ცენტრალური პარკის მიმდებარე ტერიტორიაზე გაიმართება. მოეწყობა ფანჩატურები, სადაც სტუმრებს ქართული ტრადიციული კერძების დაგემოვნების საშუალება ექნებათ, ასევე იქნება ხალხური რეწვის ოსტატებისა და ადგილობრივ ხელოვანთა ნამუშევრების გამოფენა–გაყიდვა.

ქალაქის ცენტრალურ პარკში მსახიობები რომანოვების ოჯახს განასახიერებენ, მათთან ფოტოების გადაღება ყველა მსურველს შეეძლება.
ცენტრალური პარკიდან კოსტავას სახელობის ბაღამდე „მოსიარულე ხეების“ ფორმაში ჩაცმული 16 მსახიობი მსვლელობას მოაწყობს. ასევე გაიმართება „ქოლგების ფესტივალი“ , ცენტრალურ ქუჩებში მსახიობები ტამტამებით და ქოლგებით იცეკვებენ.

დღესასწაულზე ბორჯომის საპატიო მოქალაქეებსაც დააჯილდოებენ. მათ მინიატურულ, მოოქროვილ ვეფხისტყაოსანს და 400 ლარის ოდენობის ფულადი ჯილდოს გადასცემენ.

გალა კონცერტი ბორჯომში 20:00 საათზე დაიწყება, სადაც ცნობილი შემსრულებლები: ნოდიკო ტატიშვილი, სალომე ბაკურაძე, გიორგი ნადიბაიძე, მარიტა როხვაძე, დათუნა მგელაძე, ოთო ნემსაძე და ანსამბლი „სულიკო“ იმღერებენ.

25 აგვისტოს დაგეგმილი ღონისძიებათა განრიგი:

12:00სთ – კულინარიული და ეთნოგრაფიული კუთხეები;

12:00სთ – ხელნაკეთი ნივთების, პროდუქციისა და ხალხური რეწვის ნიმუშების გამოფენა- გაყიდვა;

12:00სთ – სამცხე-ჯავახეთის რეგიონში მცხ. მხატვრების გამოფენა;

12:00სთ – ბორჯომის ქალაქის სტატუსის მინიჭებიდან 100 წლის იუბილესადმი მიძღვნილი გამოფენა;

13:00სთ – საბავშვო კუთხე; ფეის არტი; სახალისო კარიკატურები;

14:00სთ – ექსპერიმონტორიუმის შოუ;

14:00სთ – რომანოვების პერფომანსი კლასიკური მუსიკის თანხლებით;

14:00სთ – GIF აპარატი;

15:00სთ – ქოლგების ფესტივალი, "ბორჯომის ტყის გაცოცხლება“ (მოძრავი წარმოდგენები);

16:00 -17:30სთ – კონცერტი (ადგილობრივი ცეკვისა და სიმღერის ანსამბლების მონაწილეობით);

19:30სთ – საპატიო მოქალაქეების დაჯილდოება;

20:00სთ – გალა-კონცერტი (ცნობილი შემსრულებლების მონაწილეობით);

22:00სთ – ფოიერვერკი;

საზეიმო ღონისძიებებისთვის წელს 48 200 ლარი დაიხარჯება, ამ თანხაში 100 კაცზე საზეიმო ვახშამიც შედის.

[მარიამ ბარძიმაძე, ბორჯომი]