ნინოწმინდაში 90 ეკომიგრანტ ოჯახს საცხოვრებელი სახლები საკუთრებაში გადაეცემა

საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი სოზარ სუბარი, აჭრის ა/რ მინისტრის მოადგილე რამაზ ჯინჭარაძე, სამცხე-ჯავახეთის გუბერნატორი აკაკი მაჭუტაძე და ნინოწმინდის გამგებელი ნინოწმინდის მუნიციპალიტეტში მცხოვრებ ეკომიგრანტ ოჯახებს შეხვდნენ. ცენტრალუჯრი და ადგილობრივი ხელისუფლების წარმომადგენლებმა 2015 წლის 18 მაისს საქართველოს მთავრობის N996 განკარგულებით დამტკიცებული პროექტის „სტიქიური მოვლენების შედეგად დაზარალებული ოჯახების ფაქტობრივ სარგებლობაში არსებული უძრავი ნივთის საკუთრებაში გადაცემის მიზნით მოსამზადებელი სამუშაოების განხორციელების თაობაზე“ ფარგლებში მიმდინარე სამუშაოები დაათვალიერეს.

აღნიშნული პროექტის ფარგლებში ნინოწმინდის მუნიციპალიტეტში სამინისტროს მიერ 2004-2012 წლებში შესყიდული საცხოვრებელი სახლების აზომვითი საკადასტრო ნახაზების მომზადება მიმდინარეობს, რომლითაც მათი შემდგომი საკუთრებაში გადაცემის მიზნით, სახელმწიფო საკუთრებაში არსებული საცხოვრებელი სახლებისა და მიწის ნაკვეთების ახლებური წესით რეგისტრაცია (დაზუსტებული) მოხდება.

ნინოწმინდის მუნიციპალიტეტში, 90 ეკომიგრანტ ოჯახს, ხოლო საქართველოს მასშტაბით 1 200 ეკომიგრანტ ოჯახს დაუკანონდებათ საცხოვრებელი სახლი და მიწის ნაკვეთი.

[sknews.ge]