ნინოწმინდის მუნიციპალიტეტში ნაგავსაყრელი განახლდა

ნინოწმინდის მუნიციპალიტეტში ნაგავსაყრელი, რომლის ფართობიც 7269.82 მ² შეადგენს, 2011 წლიდან ფუნქციონირებს. ყოველდღიურად ამ ტერიტორიაზე დაახლოებით 11.6 მ³ ნარჩენი იყრება, რომელიც ნინოწმინდის მუნიციპალიტეტისა და მისი მიმდებარე სოფლებიდან შეაქვთ.

ნინოწმინდის მუნიციპალიტეტის ნაგავსაყრელი 2013 წლის 14 ივნისს „საქართველოს მყარი ნარჩენების მართვის კომპანიის“ საკუთრებაში გადავიდა.

„ამ დროისთვის ნაგავსაყრელზე არსებული მდგომარეობა უკიდურესად მძიმე იყო: ნარჩენების შეტანა ხდებოდა არაორგანიზებულად, ნაგავსაყრელი ოპერირებდა სტანდარტებთან შეუსაბამოდ, ვერ აკმაყოფილებდა ეკოლოგიურ და სანიტარულ ნორმებს, პოლიგონზე არ ხორციელდებოდა კონტროლი და სანიტარული ზედამხედველობა. ნაგავსაყრელის ტერიტორია არ იყო შემოღობილი და ხდებოდა როგორც მოქალაქეების, ისე ცხოველების გადაადგილება. პოლიგონის ოპერირება ზიანს აყენებდა გარემოს და საფრთხეს უქმნიდა ადგილობრივი მოსახლეობის ჯანმრთელობას“, – აცხადებენ „საქართველოს მყარი ნარჩენების მართვის კომპანიაში“.

აღნიშნულმა კომპანიამ საქართველოს რეგიონული განვითარებისა და ინფრასტრუქტურის სამინისტროს კოორდინაციით ნინოწმინდის მუნიციპალიტეტის ნაგავსაყრელზე, კეთილმოწყობის მიზნით, სამშენებლო-სამონტაჟო სამუშაოები ჩაატარა, რომლის ფარგლებშიც მოეწყო პოლიგონის შიდა გზები, წყალარინების არხები, ნარჩენები გადაიფარა საიზოლაციო ფენით, მოეწყო მიწის კავალიერები შემდგომი ექსპლუატაციისთვის, შემოიღობა ნაგავსაყრელის ტერიტორია, განთავსდა სადარაჯო ჯიხური, დამონტაჟდა სახანძრო სტენდი, ნაგავსაყრელის მაჩვენებელი ბანერები და ამკრძალავი ნიშანი. ასევე, მოხდა ტერიტორიის ელექტროფიცირება (დამონტაჟდა მზის ფოტო-ელექტრონული სისტემა), ნაგავსაყრელი აღიჭურვა სპეც-ტექნიკით და მოეწყო მანქანა-მექანიზმების ფარდული.

როგორც „საქართველოს მყარი ნარჩენების მართვის კომპანიაში“ განმარტავენ, განახლებული პოლიგონის ექსპლუატაციაში შესვლის შემდგომ, მოქმედი სტანდარტების შესაბამისად, განისაზღვრება ნარჩენების მიღება და მათი განთავსება პოლიგონზე გამოყოფილ სპეციალურ უჯრედებში, რაც მნიშვნელოვნად შეამცირებს გარემოზე მავნე ზემოქმედებას, უზრუნველყოფს ადგილობრივი მოსახლეობის უსაფრთხოებას და მათი საცხოვრებელი პირობების გაუმჯობესებას.

ნაგავსაყრელის კეთილმოწყობის პროექტის ღირებულებამ 317 596 ლარი შეადგინა.



[თამარ თოთაძე, ახალციხე]