ტელეკომპანია „მე–9 არხი“ ციფრულ მაუწყებლობაზე გადავიდა

როგორც ტელეკომპანიაში განმარტავენ, კომუნიკაციების ეროვნულმა კომისიამ „მე–9 არხს“ მეექვსე მეტრული არხი მიანიჭა. ამ არხზე აქამდე საზოგადოებრივი მაუწყებელი მაუწყებლობდა.

„გუშინ გავიდა ციფრული სიგნალის გაშვების ვადა. სამცხე–ჯავახეთში მოქმედ ორ ტელევიზიას, ბორჯომსა და ახალციხეს გვაქვს მეორე ვადა, მულტიფლექსის აგების ვადა. რაც გულისხმობს, რომ ტელეკომპანიებმა უნდა ააგონ მრავალარხიანი გადამცემი“, – განმარტავს ტელეკომპანია „მეცხრე არხის“ დირექტორი მაია იველაშვილი.

მისივე თქმით, ციფრული მაუწყებლობა იმის საშუალებას იძლევა, რომ ერთი არხი რამდენიმე არხად დაიშალოს.

„ეს არის ოთხი მაღალი გარჩევადობის და ერთი სტანდარტული გარჩევადობის სიხშირე. მულტიფლექსის აგება სწორედ ამას გულისხმობს. ამ ეტაპზე ჩვენმა ტელეკომპანიამ გააკეთა ორარხიანი მოდულატორი. ერთი არხით შეგვიძლია ჩვენი ტელევიზია გავასხივოთ, მეორე არის თავისუფალი სიხშირე, ვისაც სურვილი ექნება რომ დაფაროს ის ტერიტორია, რასაც ჩვენ ვფარავთ, შესაძლებელია მისთვის არხის დათმობა“, – ამბობს ტელეკომპანია „მეცხრე არხის“ დირექტორი და ამატებს, რომ რეგულაციები ამ მიმართულებით ჯერ ჩამოყალიბებული არ არის. ეროვნულ მულტიფლექსზე, ანუ მათთვის ვისაც უნდა რომ მთელი საქართველო დაფაროს, ტარიფი განსაზღვრულია, მაგრამ კონკურეტული ქალაქების მიხედვით ტარიფი დადგენილი არ არის.

მაია იველაშვილი ამბობს, რომ ციფრულ მაუწყებლობაზე გადასვლისთვის ფაქტობრივად ახალი ტელევიზიის შემქნა უწევთ: „გარდა იმისა, რომ იცვლება მაუწყებლობა, სიგნალი, ასევე იცვლება გადაცემების მომზადების ხარისხი. მნიშვნელოვანია, რომ იყოს ლიცენზირებული, ანუ ჩვენთვის პროგრამულადაც რთულია, არა მარტო ტექნიკური და მატერიალური თვალსაზრისით“.

ციფრულ მაუწყებლობაზე გადასვლის პროცესი 2012 წლიდან დაიწყო. რა მოდელს აირჩევდა ქვეყანა და რა სჭირდებოდათ მაუწყებლებს იმისთვის, რომ მოეხდინათ ანალოგური სიგნალის გათიშვა და ციფრულ მაუწყებლობაზე გადასვლა, თავიდან განსაზღვრული არ იყო.

„ჩვენ ვიღებდით ინფორმაციას ზოგადად რა ხდებოდა სხვა ქვეყნებში, იქნებოდა ეს ევროპული თუ ამერიკული გამოცდილება. ის მოდელი, რომელიც 2012 წელს შემუშავდა, დიდწილად შეიცვალა და ფაქტობრივად მოგვიწია ფორსმაჟორში მუშაობა. დეკემბერში მოგვენიჭა 500 ვატიანი მაუწყებლობის უფლებით მულტიფლექსის აგების უფლება და არა მაუწყებლობა“, – განმარტავს იველაშვილი.

მისივე თქმით, აქამდე არსებული კანონდებლობის მიხედვით, ლიზენცია გულისხმობდა, როგორც მომზადებას სატელევიზიო მასალის, ასევე გავრცელებას. ციფრული მაუწყებლობის დროს კი ეს გაიყო. სატელევიზიო მასალის მომზადება ყველას შეუძლია, მაგრამ გავრცელების უფლება, ანუ მულტიფლექსის აგების უფლება, მიენიჭა იმ მოქმედ ტელევიზიებს, რომლებიც ფლობდნენ აქამდე არსებულ სიხშირეებს.

[თამარ თოთაძე, ახალციხე]