ციფრული ტელევიზია - კომფორტული სიახლე (R)

ტელევიზიის ციფრულ სატელევიზიო ქსელზე გადასვლის პროცესის დასრულება 17 ივნისისთვისაა დაგეგმილი. დათქმულ ვადამდე თვეზე ნაკლები დრო რჩება. თუმცა საზოგადოებაში მომავალ ცვლილებებზე ინფორმაცია არასაკმარისია. ამ საკითხზე ჩვენი მკითხველებისგან მივიღეთ კითხვები და გვინდა, რამდენიმე მათგანს ვუპასუხოთ:

-რას ნიშნავს მიწისზედა ტელევიზიის გაციფრულება?

ციფრულ სატელევიზიო ქსელზე გადასვლა არის პროცესი, რომლის დროსაც ანალოგური მიწისზედა სატელევიზიო სიგნალი შეიცვლება ციფრული სატელევიზიო სიგნალით. შედეგად ვიღებთ სატელევიზიო სიგნალს, რომელსაც უმაღლესი ხარისხის ხმა და გამოსახულება აქვს.

-რა შეიცვლება ჩემთვის გაციფრულების შემდეგ?

ციფრულ სატელევიზიო ქსელზე გადასვლის შემდეგ ტელევიზორის ყურება უფრო სასიამოვნო პროცესი გახდება, რადგან აღარ იქნება ხაზები ეკრანზე, ხმის ხარვეზები ან სხვა მსგავსი პრობლემები, რომლებიც ანალოგური მიწისზედა მაუწყებლობისათვის იყო დამახასიათებელი.

-17 ივნისამდე მომზადება თუ ვერ მოვასწარი, სატელევიზიო ჩვენებას დავკარგავ?

ციფრულ სატელევიზიო მაუწყებლობაზე გადასვლის შემდეგ, თუ თქვენ არ გექნებათ ციფრული ტელევიზია ან სეთ–თოფ–ბოქსი, ტელევიზორის ყურებას ვეღარ შეძლებთ. თუმცა, თუ ამჟამად ტელევიზორს სატელიტის ან ინტერნეტის (IPTV) მეშვეობით უყურებთ, 17 ივნისს თქვენთვის არაფერი შეიცვლება.

- როგორ შემიძლია ციფრული სატელევიზიო სიგნალის მიღება?

ზოგადად, ციფრული სატელევიზიო სიგნალი გადაცემის ერთ პლატფორმაზე მიბმული არ არის. მისი მიღება განსხვავებული გზებითაა შესაძლებელი და მათ შორისაა: ანტენა, სატელიტი, კაბელი და IPTV. სატელიტი და IPTV უკვე ციფრულია. თუ რომელიმე მათგანის მომხმარებელი ხართ, თქვენ ციფრულ სიგნალს უვე იღებთ. თუ ციფრული სიგნალის მიღება მიწისზედა ქსელის მეშვეობით გსურთ, მოგიწევთ იყიდოთ სეთ–თოფ–ბოქსი ან ტელევიზორი, რომელსაც სეთ–თოფ–ბოქსი აქვს ჩამონტაჟებული.

- ციფრული სატელევიზიო სიგნალი სოფლებსა და მიუდგომელ რეგიონებსაც დაფარავს?

მიუდგომელ ტერიტორიებზე ციფრული სატელევიზიო სიგნალის მიღება დამოკიდებულია პლატფორმაზე, რომლის მეშვეობითაც სიგნალს იღებთ. მაგალითად, სატელიტურ სატელევიზიო სიგნალს ერთდროულად დიდი რაოდენობის მაყურებლის დაფარვა შეუძლია განსხვავებულ გეოგრაფიულ არეალებში და ქვეყნის ყველაზე მოშორებული რეგიონების მოსახლეობასაც მოიცავს. ამისათვის კი დამატებითი ინვესტიციები საჭირო არაა. IPTV-ის შემთხვევაში კი სოფლების დაფარვა უფრო გაძნელებულია.

[sknews.ge]