სცადეს თუ არა რაბათში ბავშვების გატაცება? – რას ჰყვებიან ადგილობრივები

ახალციხეში, რაბათის დასახლებაში მაცხოვრებლების ნაწილი ბავშვებს ეზოში დამოუკიდებლად აღარ უშვებს. მიზეზი, დაახლოებით, სამი თვის წინ მომხდარი შემთხევაა: ეზოში გასული სამი არასრულწლოვანი დაიკარგა. მშობლებმა ბავშვები ერთსაათიანი ძებნის შემდეგ რაბათის დასახლებასთან ახლოს ხევში, ტალახში ამოსვრილები და შეშინებულები იპოვეს.

იმ დღეს, სამი არასრულწლოვანი, ორი ბიჭი და ერთი გოგონა რაბათის დასახლებასთან ახლოს, დანგრეულ ეკლესიასთან თამაშობდა. როგორც მშობლები ყვებიან ბავშვები მოულოდნელად გაქრნენ. უცნობმა მამაკაცმა ისინი ძალის გამოყენებით ტყის მიმართულებით წაიყვანა.

„სტუმრად მივდიოდი ჩემ დასთან, ბავშვი სახლში არ იყო და ძებნა დავუწყეთ, რომ ვერ ვნახეთ, მერე მანქანით მთელი ოჯახი ვეძებდით. ჩემი მეორე შვილი ხმამაღლა ყვიროდა, რომ როგორმე ხმა მიგვეწვდინა. მერე დავინახეთ, რომ ტყესთან ახლოს ხრამიდან მოდიოდნენ ბავშვები. სავარაუდოდ, იმ კაცმა ჩვენი ყვირილი გაიგონა და ბავშვებს ხელი გაუშვა“, – გვიყვება ერთ–ერთი არასრულწლოვანის ბებია.

მისი თქმით ბავშვები შეშინებულები და მიწაში ამოსვრილები დაბრუნდნენ: „ყვებოდნენ, რომ გოგოს პირზე ააფარა ხელი და ისე წაიყვანა, ბიჭებს კი კისერში წაავლო ხელი და მიათრევდა. სომხურად ლაპარაკობდა და ბავშვებმა ვერაფერი გაიგეს. როგორც მოგვიყვნენ მაღალი, ცოტა მელოტი მამაკაცი იყო, რომელსაც შავი სათვალე ეკეთა და ცოტა კოჭლობდა კიდეც. ბავშვი ძალიან შეშინებული იყო, რამდენიმე დღე სახლიდან გარეთ ვერ გადიოდა“.

არასრულწლოვანის ოჯახის წევრებმა მამაკაცს, რომელმაც ბავშვები ტყის მიმართულებით წაიყვანა ძებნა მაშინვე დაუწყეს, თუმცა, ვერ ნახეს.
მომხდარის შესახებ ერთ–ერთი არასრულწლოვანის ბებიამ უბნის ინსპექტორს, გიორგი ხითარიშვილს შეატყობინა და ახალციხის რაიონულ სამმართველოში განცხადებაც დაწერა. სამივე ბავშვის ოჯახის წევრები ამბობენ, რომ მომხდარს სამართალდამცავების მხრიდან რეაგირება არ მოჰყოლია.

„ერთხელ იყო პოლიცია მოსული და მშობლებთან ერთად ბავშვები დაკითხეს, ამის შემდეგ რა მოხდა აღარაფერი ვიცით“, – ამბობს ერთ–ერთი ბავშვის მშობელი.

არასრულწლოვნების ახლობლები პოლიციას უმოქმედობაში ადანაშაულებენ და აღნიშნული ფაქტის დროულ გამოძიებას ითხოვენ.
შინაგან საქმეთა სამინისტროში კი აცხადებენ, რომ ახალციხის რაიონულ სამმართველოში მსგავსი სახის შეტყობინება არ შესულა: „არასრულწლოვანი ბავშვების ტყეში წაყვანის ან რაიმე მსგავსი ფაქტის შესახებ პოლიციაში შეტყობინება არ შემოსულა. როგორც ჩანს არასწორი ინფორმაცია გაქვთ“.

არასრულწლოვნების ოჯახის წევრები კი ირწმუნებიან, რომ პოლიციაში განცხადება ორჯერ დაწერეს. მეორედ განცხადების დაწერა მას შემდეგ გადაწყვიტეს, რაც პირველს რეაგირება არ მოჰყვა.

„უბნის ინსპექტორს დავურკეთ და ვუთხარით, რომ თუ ყურადღებას არ მოგვაქცევდნენ პროკურატურაში ვიჩივლებდით, მაგრამ გვითხრა დაადეთ ხელი ვინ არის და დავიჭერთო. რომ ვიცოდეთ ვინ არის, ასე ჩვენც ხომ დავიჭერთ?!“, – კითხულობენ არასრუწლოვნების ოჯახის წევრები.

პროკურატურაში აღნიშნულ საკითხთან დაკავშირებით განცხადება არ შესულა. სამცხე–ჯავახეთის საოლქო პროკურორის მოადგილე გიორგი ბახტაძე აცხადეს, რომ ერთ–ერთმა მშობელმა პოლიციას მიმართა: „ამ მიმართვაში ამბობს, რომ ბავშვები თამაშობდნენ, ვიღაც უცხო კაცმა გაიარა, მათ შეეშინდათ და სახლში გაიქცნენ. პოლიციამ იმის გასარკვევად, იკვეთებოდა თუ არა რაიმე დანაშაულის ნიშნები მშობლები გამოკითხა. მათაც იგივე დაადასტურეს, რომ სამი ბავშვი თამაშობდა, უცხო კაცმა გაიარა და შეეშინდათ. აქ დანაშაულის ნიშნები არ იკვეთება და ამიტომ გამოძიებაც არ დაწყებულა“.

ადგილობრივები ამბობენ, რომ რაბათის დასახლებაში, იმ ხრამთან ახლოს, სადაც ბავშვები იპოვეს, მიტოვებული სათბურებია და აქ ნასვამ მდგომარეობაში მყოფ მამაკაცებს ხშირად ხედავენ, თუმცა იმ ფაქტს, რომ სათბურში მყოფმა რომელმე მამაკაცმა წაიყვანა ბავშვები ძალით, ვერ ადასტურებენ.

მოსახლეობა აღნიშნულ ტერიტორიაზე მოძრაობას ერიდება. ამბობენ, რომ აქ ბოლო დროს რამდენჯერმე ქალის კივილიც გაიგონეს.
„ნაკვეთი მაქვს სათბურთან ახლოს, მაგრამ აღარ მივდივარ. ძალიან მეშინია, შესაძლოა ვინმე დამხვდეს და მომკლას. სრული უპატრონობაა“, – ამბობს რაბათის დასახლებაში მცხოვრები იზოლდა გიორგაძე.

რედაქციისგან: მომხდარზე ბავშვების ოჯახის წევრები ღიად საუბრობენ, თუმცა, იმის გამო, რომ საქმე არასრულწლოვნებს ეხებათ, რედაქცია მათ ვინაობას არ ასაჯაროებს.

[თინათინ ზაზაზე, ახალციხე]