ახალციხეში რაბათის დასახლებაში ტყე იჩეხება

რაბათის უბანში, სასაფლაოს მიმდებარე ტერიტორიაზე ტყის მასივის ერთ მონაკვეთზე 11 ხეა მოჭრილი. უკანონოდ მოჭრილი ხის ნაწილი წაღებულია, ნაწილი კი ჯერ ისევ ტყეშია.

სამცხე–ჯავახეთის სატყეო სამსახურში ამბობენ, რომ ეს ტერიტორია ახალციხის სატყეო უბანს ეკუთვნის, მას მცველი ჰყავს და მდგომარეობაც ყოველთვის კონტროლდება. მიუხედავად ამისა ბრაკონიერები ხის უკანონო ჭრას მაინც ახერხებენ.

„ეს ტერიტორია, სადაც უკანონო ჭრები დაფიქსირდა ტყე–კაფისთვის გამოყოფილი არ არის, შესაბამისად აქ ხის მოჭრა საერთოდ აკრძალულია“, – ამბობს სამცხე–ჯავახეთის სატყეო სამსახურის უფროსი კობა სილაგაძე.

მისი თქმით, აქ უკანონო ჭრები ხშირად ფიქსირდება: „ჩვენმა მეტყვევემ აქ 2017 წლის 24 აპრილს შენიშნა მოჭრილი ხეები, აღრიცხა და რეაგირებისთვის შსს–ს ახალციხის რაიონულ სამმართველოს გადასცა. რა რეაგირება მოჰყვა ამას არ ვიცით“.

შინაგან საქმეთა სამინისტროში აცხადებენ, რომ 2017 წლის აპრილში ახალციხის სატყეო უბნიდან, (რომელიც ელიაწმინიდს მონაკვეთზეა), უკანონოდ მოპოვებული ხე–ტყის შესახებ ინფორმაცია არ შესულა.

უკანონოდ მოჭრილ ხე–ტყესთან ერთად, ამავე სატყეო უბანში საყოფაცხოვრებო და სამშენებლო ნარჩენებიცაა. სილაგაძე ამბობს, რომ ტყის დანაგვიანებაზე შესაბამისი ოქმის შედგენა მათი მოვალეობაა: „დანაგვიანების შესახებ არაფერი ვიცით, თუმცა აუცილებლად მოვიკითხავთ და შესაბამის რეაგირებასაც მოვახდენთ“.







[ლუბა გიორგაძე, ახალციხე]