ახალციხელობის აღნიშვნა სპორტული ღონისძიებებით გრძელდება

გარბენი პაატა ნათენაძისა და მერაბ კოსტავას ქუჩაზე გაიმართა. მასში ახალციხის სასპორტო სკოლის მოსწავლეები მონაწილეობდნენ.

ვაჟებსა და გოგონებში პირველი, მეორე და მესამე ადგილის მფლობელები უკვე გამოვლინდნენ. ვაჟებს შორის პირველი ადგილი მინდია ენდელაძეს ერგო, გოგონებს შორის კი მართა ჯვარიძეს. გამარჯვებულებს დღეს, საღამოს, ახალციხის ციხის ტერიტორიაზე, მერიის წარმომადგენლები დააჯილდოვებენ.

„დღეს მთელი დღის განმავლობაში გაიმართება სხვადასხვა ღონიძიებები. გამარჯვებულები კი საღამოს დაჯილდოვდებიან“, – განაცხადა სპორტისა და ახალგაზრდობის მთავარმა სპეციალისტმა გელა ძამუნაშვილმა.

მისივე თქმით, გარბენში მონაწილეობა ახალციხის სასპორტო სკოლის მოსწავლეებთან ერთად ნებისმიერ მსურველს შეეძლო, თუმცა, მსურველები არ გამოჩენილან.

"ახალციხელობის" ფარგლებში, ამ დროისთვის, ახალციხის ციხეში იმართება საქართველოს პირველობა ქართულ ჭიდაობაში და შეჯიბრი ჭადრაკში. დაგეგმილია შეჯიბრი ნარდსა და მკლავჭიდში.

[ვარლამ წიკლაური, ახალციხე]