51.000 ლარის ხრეში - საკრებულოს დაპირისპირების თემა

16 ივნისს ახალციხის მუნიციპალიტეტის საკრებულოს დეპუტატებმა რიგგარეშე სხდომა გამართეს. სხდომაზე განხილული 4 საკითხიდან, 3 სტიქიით დაზარალებული სოფლების მდგომარეობას შეეხებოდა.

ახალციხის მუნიციპალიტეტის გამგეობის შესყიდვების სამსახურის უფროსმა ქეთევან ინასარიძემ საკრებულოს სხდომაზე განაცხადა, რომ იმის გამო, რომ დაზიანებული სოფლების გზები სასწრაფოდ შეკეთდეს, გამგეობა ერთ პირთან მოლაპარაკების საფუძველზე, 51 ათასი ლარით, ხრეშის ყიდვას გეგმავს.

აღნიშნულ საკითხს „ნაციონალური მოძრაობის“ დეპუტატებმა მხარი არ დაუჭირეს. უმცირესობამ მოითხოვა დეტალური ინფორმაცია იმის შესახებ, რამდენ სოფელში უნდა გაკეთდეს გზა, რა მონაკვეთზე და ზუსტად რა რაოდენობის ხრეშია საჭირო. „ნაციონალებმა“ ერთ პირთან მოლაპარაკების საფუძველზე ხრეშის შესყიდვაც გააპროტესტეს.

„კარგი იქნება თუ ზუსტად გაარკვევენ რომელ სოფლებშია გზები გასაკეთებელი, რა მონაკვეთზე, რა რაოდენობის ხრეში სჭირდებათ და ამის შემდეგ გახარჯონ ეს თანხა, იქნებ მეტია საჭირო, ან პირიქით. არც ის მიმაჩნია მართებულად, რომ ხრეში ერთ პირთან მოლაპარაკების საფუძველზე შეისყიდონ. რომელ სოფელსც სასწრაფოდ ესაჭიროება გზის შეკეთება, მაგაზე გამოაცხადონ გამარტივებული ტენდერი, დანარჩენზე ჩვეულებრივად“, – აცხადებს კახაბერ მოდებაძე.

ახალციხის მუნიციპალიტეტის გამგეობაში კი ირწმუნებიან, რომ სტიქიამ რამდენიმე სოფელში გზა ისე დააზიანა, რომ მოსახლეობა სახლამდე ვერ მიდის.

„მოვარდნილმა ღვარცოფმა გზები თითქმის ყველა სოფელში დააზიანა. განსაკუთრებით ცუდი მდგომარეობაა ურაველის, საძელის, წინუბნის, გურკელის, გიორგიწმინდის, ანდრიაწმინდის, ფერსის და მუგარეთის მიმართულებით. მაგალითად, საძელში 50 – 60 სანტიმეტრის სიღრმის ხრამებია გაჩენილი“, – ამბობს ახალციხის მუნიციპალიტეტის გამგეობის ინფრასტრუქტურის სამსახურის უფროსი ნოდარ ბალახაშვილი.

გამგეობაში აცხადებენ, რომ გზები სასწრაფოდ შესაკეთებელია, რადგან მოსახლეობა სახლამდე მისვლას ვერ ახერხებს.

[მანანა სარაშვილი, ახალციხე]