მეთერთმეტეკლასელების გამოცდები დაიწყო

17 ივნისს მეთერთმეტეკლასელების გამოსაშვები გამოცდები 09:00 საათზე გეოგრაფიის გამოცდით დაიწყო. გამოცდები ერთდროულად 1 600 სკოლაში ტარდება და 41 ათასზე მეტი მოსწავლეა დარეგისტრირებული.

მოსწავლეები გამოცდას 4 საგანში (გეოგრაფია, ფიზიკა, ბიოლოგია, ქიმია) ჩააბარებენ. ეს ის საგნებია, რომელთა სწავლაც მე-11 კლასში დასრულდა. გამოსაშვები გამოცდები ეროვნული სასწავლო გეგმით გათვალისწინებულ ყველა სავალდებულო საგანში ტარდება. იმ მოსწავლეებს, რომლებიც ვერ გადალახავენ ზღვარს რომელიმე საგანში (ან ვერ გამოცხადდებიან გამოცდაზე), შესაძლებლობა ექნებათ შესაბამისი საგანი მეთორმეტე კლასის ბოლოს ჩააბარონ დანარჩენ 4 გამოცდასთან (ქართული ენა და ლიტერატურა, უცხოური ენა, მათემატიკა, ისტორია) ერთად.

საქართველოს განათლებისა და მეცნიერების სამინისტროს ინფორმაციით, გამოსაშვები გამოცდები კომპიუტერზე ადაპტირებული ტესტირების ქართული მოდელით (Gcat) ტარდება. მოსწავლის შესაძლებლობებზე მორგებული ტესტირების ქართული ვერსია - ალგორითმი და პროგრამული უზრუნველყოფა შეფასებისა და გამოცდების ეროვნულ ცენტრში შეიქმნა.

სისტემის მაქსიმალური დაცულობისათვის ასევე მომზადდა და დაინერგა სპეციალური პროგრამა ე.წ. Gcat browser, რომელიც ტესტირების სრულ დაცულობას უზრუნველყოფს და კომპიუტერის სტანდარტულ შესაძლებლობებს ზღუდავს. სისტემა კონკრეტულ კითხვაზე გაცემული პასუხის მიხედვით ურჩევს მოსწავლეს მომდევნო კითხვას, სანამ მის ცოდნასა და შესაძლებლობებს არ დაადგენს.

შეგახსენებთ, რომ მეთერთმეტე კლასის მოსწავლეებისთვის გუშინ, 16 ივნისს პრეტესტი ჩატარდა. თბილისში მომხდარი სტიქიის გამო, გამოცდებმა მხოლოდ ერთი დღით გადაიწია, რის გამოც სარეზერვო დღეს (შაბათს) გამოყენებენ.

[თამარ თოთაძე, ახალციხე]