გლოვის დღეს გამართული კონცერტიდან თანხის ნაწილი ქველმოქმედებას მოხმარდა

ანსამბლ „მესხი ფრთოსანის“ ქორეოგრაფი ბესარიონ კოვზიაშვილი „სამხრეთის კარიბჭესთან“ საუბარში აცხადებს, რომ 15 ივნისს კონცერტის ჩატარება მისთვისაც ძალიან მძიმე ფაქტი იყო. ამის შესახებ ანსამბლის ხელმძღვანელმა ოფიციალური განცხადებაც გაავრცელა მას შემდეგ, რაც „სამხრეთის კარიბჭემ“ სტატია გამოაქვეყნა.

„ჩვენ ვართ ხელოვანი ხალხი და ჩვენი "იარაღი" ნებისმიერ შემთხვევაში არის ის შემოქმედება, რომელსაც მთელი ცხოვრება ვემსახურებით, სწორედ ამიტომ ჩვენმა ანსამბლმა მიიღო გადაწყვეტილება, შევუერთდეთ ერთ მუშტად შეკრულ საზოგადოებას და კონცერტზე შემოსული თანხის ნაწილი გადაურიცხოთ უსახლკაროდ დარჩენილ, ჩვენს დებსა და ძმებს, რადგან გვჯერა, რომ ამ ეტაპზე ეს ბევრად მნიშვნელოვანია, ვიდრე კონცერტის გადადება და გაყიდული ბილეთების (თანხის) უკან დაბრუნება“, – ნათქვამია განცხადებაში, რომელიც ერთგავარად ხსნის ვითარებას და ბოდიშს უხდის საზოგადოებას იმის გამო, რომ ცოტა არ იყოს, განმარტება დააგვიანდა.

ბესარიონ კოვზიაშვილი დღეს „სამხრეთის კარიბჭეს“ თავად დაუკავშირდა და იმ ანგარიშის მოძიებაში სთხოვა დახმარება, სადაც თანხის გადარიცხვა იყო შესაძლებელი. ანსამბლმა შემოსული თანხის ნაწილი ნამდვილად გადარიცხა დაზარალებულთა ფონდში, ლიბერთი ბანკის ანგარიშზე GE27LB0010045017001717. მოგვიანებით ამის დამადასტურებელი ფოტო ანსამბლმა ფეისბუქის გვერდზეც გაავრცელა.

„200 ლარი გადავრიცხეთ. ძალიან ძვირი დაჯდა ეს კონცერტი, ბევრი ხარჯი იყო, 150 ბილეთი არ გაიყიდა და უკან წავიღე, ძალიან ცოტა თანხა დაგვრჩა, ამიტომ ვრიცხავთ 200 ლარს“, – განუცხადა „სამხრეთის კარიბჭეს“ „მესხი ფრთოსანის“ ქორეოგრაფმა ბესარიონ კოვზიაშვილმა.

[ნინო ნარიმანიშვილი, ახალციხე]