საქართველოში 15 ივნისი გლოვის დღედ გამოცხადდა

ამის შესახებ საქართველოს პრემიერმა კრიზისების მართვის საბჭოს სხდომაზე განაცხადა.

"სამწუხაროდ, გვყავს ჩვენ დაღუპულები და მინდა მივუსამძიმრო მათ ოჯახებს საქართველოს მთავრობის სახელით. ძალიან დიდი ტრაგედიაა და მინდა გლოვის დღედ გამოვაცხადოთ. ამისთვის უკვე არის მზად საქართველოს მთავრობის განკარგულება. 13-14 ივნისს თბილისში მომხდარ სტიქიის შედეგად გარდაცვლილთა პატივსაცემად, საქართველოში 15 ივნისი გლოვის დღეს გამოცხადდება", - განაცხადა პრემიერმა.

პრემიერ მინისტრმა კიდევ ერთხელ მოუწოდა მოსახლეობას თავი შეიკავონ გადაადგილებისგან და ცხოველების შენიშვნის შემთხვევაში დაუკავშირდნენ 112-ს.

შეგახსენებთ, გუშინ, 13 ივნისს, გვიან ღამით, მდინარე ვერეს ადიდების გამო გარდაცვლილთა რაოდენობა 12–მდე გაიზარდა, დაღუპულებს შორის არიან მაშველებიც. ზუსტდება დაკარგული მოქალაქეების რაოდენობა. თბილისის საავადამყოფოებში რეგისტრირებულია 36 დაშავებული ადამიანი. ათობით ოჯახი კი უსახლკაროდაა დარჩენილი. ზოოპარკის დატბორვის გამო, თბილისის ქუჩებში ამ დრომდე ეძებენ ზოოპარკიდან გამოსულ მტაცებელ ცხოველებს. თბილისის ქუჩებში შეზღუდულია გადაადგილება.

ბათუმსა და ქუთაისში შეიქმნა შტაბები თბილისელების დასახმარებლად. თბილისში შექმნილია მოხალისეთა ჯგუფი, რომელბიც ეხმარებიან დაზარალებულებს.

[ნინო ნარიმანიშვილი, ახალციხე]