სესხით ნაყიდი ნაგავმზიდები ექსპლუატაციაში აპრილიდან შევა

ადიგენში, ბორჯომსა და ქალაქ ახალციხეში ახალი ნაგავმზიდები ჯერ ისევ გაჩერებულია. ასპინძის მუნიციპალიტეტში ორივე ახალი ნაგავმზიდი მუშაობს, თუმცა ისე, რომ ტექნიკური პასპორტები ჯერ გაკეთებული არ აქვთ.

„ჩვენ არ გვყავდა მანამდე ნაგავმზიდი და ამიტომ ორივეს ვიყენებთ უკვე. ნებართვა აღბული გვაქვს, ტექნიკური პასპორტები ამ დრომდე რატომ არ გაკეთდა არ ვიცი“, – ამბობს ასპინძის მუნიციპალიტეტის გამგეობის ააიპ დასუფთავების სამსახურის უფროსი ნუგზარ
ელიზბარაშვილი.

როგორც ადიგენის მუნიციპალიტეტის გამგეობის ააიპ დასუფთავების სამსახურის უფროსი სოსო რეხვიაშვილი ამბობს, მანქანების ნომრები უკვე აღებული აქვთ: „ხელშეკრულებებიც გაფორმდება და პირველი აპრილიდან ექსპლუატაციაში შევა“.
პირველი აპირლიდან დაიწყებს მუშაობას ახალი ნაგავმზიდები ბორჯომშიც: „ტექნიკური პასპორტები უკვე გვაქვს, მანამდე სხვა დოკუმენტებიც მოწესრიგდება“.

ამ დრომდე არ გადასცემია ახალი ნაგავმზიდები ახალციხის მერიის დასუფთავების სამსახურს.

„ჯერ მანქანები ექსპლუატაციაში არ შესულა, ურნებსაც ველოდებით“, – ამბობს შპს „კეთილმოწყობის“ სამსახურის უფროსი გიორგი ლონდარიძე.

როგორც დასუფთავების სამსახურების უფროსები აცხადებენ, გარდა ბორჯომისა, ამ დრომდე ურნები სხვა მუნიციპალიტეტებს არ მიუღიათ.
„20 ურნა ბაკურიანში უკვე გადავანაწილეთ. დანარჩენებსაც აპრილში განვალაგებთ იქ სადაც საჭიროა“, – ამბობს ააიპ ბორჯომის დასუფთავების სამსახურის უფროსი მერაბ იობაშვილი.

სხვა მუნიციპალიტეტებისგან განსხვავებით, ახალციხის თემმა ახალი ნაგავმზიდები დასუფთავების სამსახურს უკვე გადასცა. ამის შესახებ 10 მარტს გამართულ საკრებულოს სხდომაზე ახალციხის მუნიციპალიტეტის გამგებელმა ზაზა მელიქიძემ განაცხადა.

შეგახსენებთ, რომ ახალციხის თემმა ნაგავმზიდებისა და ურნებისთივს სესხი 483 021 ლარი აიღო, ბორჯომმა – 463 643 ლარი, ასპინძამ – 431 295 ლარი, ადიგენმა – 154 781 ევრო, ქალაქ ახალციხემ კი 521 814 ლარი.

ვალი მუნიციპალიტეტებმა 10 წელიწადში უნდა დაფარონ.

[თამუნა უჩიძე, ახალციხე]