ხუთი წლის ბავშვების სკოლაში მიყვანის ინიციატივას პარლამენტი კიდევ ერთხელ უყრის კენჭს

"ნაციონალურმა მოძრაობამ" ბიუროს დღევანდელ სხდომაზე, პარლამენტის რეგლამენტის იმ მუხლის გამოყენება სთხოვა, რომელიც მეორე მოსმენით კენჭისყრისას ჩაგდებული პროექტის განმეორებით კენჭისყრას ითვალისწინებს. ბიურომ უმცირესობის მიმართვა გაითვალისწინა და საკითხი პლენარული სხდომის დღის წესრიგში ასახა.

"ზოგადი განათლების შესახებ" კანონში დაგეგმილი ცვლილებებით, რომლის ავტორი და ინიციატორი ოპოზიციონერი დეპუტატი კობა სუბელიანია, სკოლაში ხუთი წლის ასაკიდან მისვლის შესაძლებლობა იმ ბავშვებს ეძლევათ, რომელთაც ექვსი წელი დეკებრამდე უსრულდებათ. პირველი მოსმენისას სუბელიანის პროექტს მხარი მმართველი გუნდიდანაც დაუჭირეს, თუმცა მეორე მოსმენისას პროექტი ჩავარდა.

როგორც "ნაციონალურ მოძრაობაში" აცხადებენ, ეს დეპუტატებზე განათლების და მეცნიერების მინისტრის თამარ სანიკიძის ზეწოლის შედეგად მოხდა.

შეგახსენებთ, რომ საქართველოს განათლებისა და მეცნიერების სამინისტროს გადაწყვეტილებით 2015-2016 სასწავლო წელს სასკოლო ასაკის მქონედ ის ბავშვები ჩაითვლებიან, რომელთაც 6 წელი 2015 წლის 14 სექტემბრის ჩათვლით შეუსრულდებათ.

[Sknews.ge]