ახალციხის მუნიციპალიტეტის გამგებელს შესაძლოა სასამართლოში უჩივლონ

ახალციხის მუნიციპალიტეტის გამგეობის ადმინისტრაციული სამსახურის ყოფილმა სპეციალისტმა, მატერიალურ–ტექნიკური უზრუნვლყოფის საკითხებში, ვეფხვია ხუციშვილმა, საჯარო მოხელეთა შესარჩევ კონკურსში მესამე ეტაპი, გასაუბრება ვერ გაიარა.

„შეკითხვები დამისვეს ნათურებთან დაკავშირებით, როგორ გავაკეთოთ ეკონომია, რომ შენობაში ნათურები ყველგან არ ენთოსო. ვუთხარი, მე ეს არ მევალება, ჩემი საქმე ნათურებისა და ჩამრთველების შეცვლა იყო–თქო. აშკარად არ მოეწონათ პასუხი“, – ამბობს ხუციშვილი.

ვეფხვია ხუციშვილი ვარაუდობს, რომ კომისიის გადაწყვეტილება მასსა და გამგებელს შორის არსებულმა უთანხმოებამ განაპირობა. დაპირისპირება უფროსთან საკანცელარიო ნივთების შენახვაზე მოუვიდა. ხუციშვილი ამბობს, რომ გამგებელი ითხოვდა საკანცელარიო ნივთები თავის ოთახში შეენახა. თუმცა, გამგეობის თანამშრომლები წინააღმდეგები იყვნენ: „ჩვენ გვიანობამდე ვმუშაობთ, შენ მალე მიდიხარ და "კარტრიჯი", რომ გამოგველიოს, გვიან ღამით სად გეძებოთო“.

მისივე თქმით, ამ წინააღმდეგობის შესახებ გამგებელმა გაიგო და თანამშრომლებთან მასალი შენახვაზე მიღებული გადაწყვეტილება უარყო: „უთხრა, ხუციშვილი ვერ გებულობს და თქვენამდე სხვა ინფრომაცია მოაქვსო. აღარ დამიმალავს, ყველაფერი პირში ვუთხარი გამგებელს, ეს ყველაფერი კი ჩემი სამსახურიდან გაგდების მიზეზი გახდა“.

ახალციხის მუნციპალიტეტის გამგებელი ზაზა მელიქიძე ხუციშვილის ნათქვამს კატეგორიულად უარყოფს: „არ გვქონია დაძაბული ურთიერთობა. არავითარი ინტერესი არ იყო, გასაუბრება ვერ გაიარა, კომისიის წევრებმა მიიღეს გადაწყვეტილება. არც თანამშრომლობის დროს არ მქონია ამ ადამიანთან პრეტენზიები“.

ვეფხვია ხუციშვილმა ტესტირებაზე 45 ქულა მიიღო. გასაუბრებაზე კი ვეღარ გავიდა: „გასაუბრებაზე კომისიის 2 წევრი არ იყო. 5–ბალიანი სისტემით შემაფასეს საშუალო არითმეტიკულით 2,67 ქულა გამომივიდა, 2,86 მაინც უნდა მიმეღო, რომ გადამელახა“.
ხუციშვილმა გასაუბრების პასუხი 6 იანვარს მიიღო, ამავე დღეს შეიტანა საჩივარი საპრეტენზიო კომისიაში, თუმცა პასუხი აქედანაც უარყოფითი იყო.

„საკონკურსო–საატესტაციო კომისიიდან ყველა მონაცემი გამოვითხოვეთ. ინდივიდუალური მაჩვენებლით არის შეფასებული, ხუციშვილმა ბარიერი ვერ გადალახა და ამიტომ ჩვენი კომისიიიდანაც უარი ეთქვა“, – ამბობს საპრეტენზიო კომისიის თავმჯდომარე გელა ნოზაძე, რომელიც ახალციხის მუნციპალიტეტის საკრებულოს თავმჯდომარის მოადგილეა. ნოზაძეც ირწმუნება, რომ კონკურსის დროს პირადი დაინტერესება არ ყოფილა.
ვეფხვია ხუციშვილი საკუთარი უფლებების დასაცავად ბრძოლას აპირებს.

„საკონკურსო–საატესტაციო კომისიიდან მოვითხოვე თითოეული წევრის შეფასება. ველოდები ქულების ამონაწერს, იურიდიული დოკუმენტი რომ მქონდეს და თბილისში „ქართული ოცნების“ შტაბში მიმაქვს. ვაპირებ შევხვდე პრეზიდენტს და პრემიერ–მინისტრს, რომ ამ უსამართლობას ბოლო მოეღოს“, – აცხადებს ხუციშვილი.

[თინათინ ზაზაძე, ახალციხე]