ახალციხის მერმა საფინანსო–საბიუჯეტო სამსახურის უფროსი დანიშნა

ახალციხის მერიის საფინანსო–საბიუჯეტო სამსახურის დებულების დამტკიცების შესახებ, ახალციხის საკრებულომ დღეს, 22 ნოემბერს გამართულ სხდომაზე იმსჯელა.

დღესვე ცნობილი გახდა, რომ საფინანსო–საბიუჯეტო სამსახურის უფროსად გელა ლომიძე დაინიშნა. ლომიძე ბოლო ოთხი წლის განმავლობაში ახალციხის მუნიციპალიტეტის გამგეობაში ამავე სამსახურს ხელმძღვანელობდა.

„ახლა მუნიციპალიტეტი თითქმის პარალიზებულია, რადგან სახვადასხვა ფინანსური თუ სხვა ოპერაციები ვერ ხორციელდება. გარდა ამისა, 2018 წლის ბიუჯეტზეა სამუშაო და საფინანსო–საბიუჯეტო სამსახურის დებულების დამტკიცება და ხელმძღვანელის დანიშვნა აუცილებელი იყო“, – განაცხადა ახალციხის საკრებულოს თავმჯდომარემ გელა ნოზაძემ.

ამ ეტაპზე მერიაში სხვა სამსახურების ხელმძღვანელები არ დანიშნულან, ასევე, ჯერ უცნობია სხვა საკადრო ცვლილებების შესახებ.

დღეს ცნობილი გახდა მხოლოდ ის, რომ მერიაში იურიდიული და ადმინისტრაციული სამსახურები გაერთიანდება და ერთ სამსახურად ჩამოყალიბდება. დღესვე დეპუტატებმა ამ სამსახურის დებულების დამტკიცებას უყარეს კენჭი. ამ დროისათვის არც ამ სამსახურს ჰყავს ახალი ხელმძღვანელი.

[ლუბა გიორგაძე, ახალციხე]