ბორჯომში შალვა აბულაძის კაფეს ხანძარი გაუჩნდა

ტელეკომპანია "ბორჯომის" ფოტო

კაფე, სახელწოდებით „1 + 2“ ბორჯომის ცენტრალურ პარკთან მდებარეობს. როგორც ბორჯომის მცხოვრებლებმა „სამხრეთის კარიბჭეს“ განუცხადეს, კაფე ნაწილობრივაა დამწვარი.

ხანძრის შესახებ გამოძახება არ შესულა ბორჯომის სახანძრო – სამაშველო სამსახურში.

„დღეს ხანძრის შესახებ ჩვენთან არანაირი ინფორმაცია არ შემოსულა, შესაბამისად არ ვიცით რა მოხდა“, – ამბობს ბორჯომის სახანძრო – სამაშველო სამსახურის დირექტორი ლევან ჩაჩანიძე.

თუმცა, ხანძრის ფაქტს ადასტურებს საქართველოს შინაგან საქმეთა სამინისტრო. შსს–ს ინფორმაციით, მომხდარზე ძიება სისხლის სამართლის კოდექსის 187-ე მუხლით დაიწყო, რაც სხვისი ნივთის დაზიანება/განადგურებას გულისხმობს.

შეგახსენებთ, 4 აპრილს, ღამით, თბილისში, ვარკეთილში, სამსახურეობრივი მოვალეობის შესრულებისას ორ პოლიციელს შეიარაღებულმა პირმა ცეცხლი გაუხსნა. ერთ–ერთი მათგანი საავადმყოფოში მიყვანის შემდეგ გარდაიცვალა, ხოლო მეორე ამ დრომდე მკურნალობს.

შსს–ს ინფორმაციით, მკვლელობაში ბრალდებული 1977 წელს დაბადებული შალვა აბულაძეა. შსს–ში აცხადებენ, რომ აბულაძე კიდევ ერთი პლიციელის მკვლელობაშია ბრალდებული, ეს მკვლელობის ხელწერითა და იარაღის ტიპით დგინდება. საუბარია 2015 წლის 23 იანვარს, ბორჯომში, ლიკანში, სამსახურეობრივი მოვალეობის შესრულებისას დაჭრილ პოლიციელზე, გიორგი ბერუაშვილზე, რომელიც მიყენებული ჭრილობების შედეგად 6 თებერვალს გარდაიცვალა. აბულაძემ მაშინაც ორი პოლიციელი დაჭრა, გიორგი ბერუაშვილი და გიორგი მახარაშვილი.

შსს–ს ინფორმაციით, ამ ეტაპზე მიმდინარეობს ინტენსიური ოპერატიულ–სამძებრო ღონისძიებები შალვა აბულაძის ადგილსამყოფელის დადგენისა და დაკავების მიზნით. შალვა აბულაძის ადგილსამყოფელის დასადგენად და მის დასაკავებლად საგანგებო ოპერატიული სამძებრო ღონისძიებები ბორჯომშიც მიმდინარეობს.



[მანანა სარაშვილი, ბორჯომი]