შეიცავდა თუ არა ყრილობა კანონდარღვევის ნიშნებს?

”ერთიანი ნაციონალური მოძრაობის” პარტიულ ყრილობაზე ხალხის მობილიზება მთელი რეგიონის მასშტაბით მოხდა. მოსახლეობა სამარშუტო ტაქსებით ყველა მუნიციპალიტეტიდან ჩამოვიდა. ამისთვის ახალციხის ავტოსადურში ხაზიდან ათობით სამარშრუტო ტაქსი მოიხსნა. თითქმის არცერთი მიმართულებით რეისი არ შესრულებულა. ამ ტერიტორიაზე მხოლოდ რეგიონის მასშტაბით სხვადასხვა მუნიციპალიტეტებიდან ჩამოსული, ”ერთიანი ნაციონალური მოძრაობის” სიმბოლიკებით მორთული, სამარშრუტო ტაქსები იდგა.

საარჩევნო საკითხების მკვლევარის ნინა ხატისკაცის განმარტებით, ასე არათანაბარ პირობებში ხდება პოლიტიკური კამპანიის წარმოება პარტიებისთვის. ამგვარი რესურსი წარმოუდგენელია ხელმისაწვდომი იყოს ნებისმიერი ოპოზიციური პარტიის აქციისთვის.

”საჯარო სერვისი, ავალდებულებს მათ ყოველდღიურად მოემსახურონ მოსახლეობას, ამდენად ამის შეზღუდვა და მხოლოდ ერთი პარტიის კამპანიისთვის გამოყენება არის პარტიის სასარგებლოდ განხორციელებული უკანონო შემოწირულობა”, - აცხადებს ხატისკაცი.

იგივეს აცხადებს ”საერთაშორისო გამჭვირვალობა საქართველოს” იურისტი ირინე ურუშაძე. მისი თქმით, თუ ეს შპს-ები კერძო კომპანიები არიან და მათ მომსახურებისთვის დამკვეთმა ფული არ გადაუხადა, მაშინ მათი მხრიდან ადგილი ჰქონდა უკანონო შეწირულობას, რაც კანონით ისჯება.







[Sknews.ge]