შპს ”ასტორიას” უკანონო შეწირულობა ”ნაციონალურ მოძრაობას”

ადგილობრივი სამშენებლო კომპანია, შპს ”ასტორია” გზის სამშენებლო სამუშაოებზე ყოფილ სამხედრო დასახლებაში, კოსტავას ქუჩაზე, მეხუთე დღეა მუშაობს.

ტრაქტორის ოპერატორის ვანო მანველიშვილის განცხადებით, ტრაქტორი კომპანიის საკუთრებაა: ”ამ ტრაქტორით ჯერ გზას ვასწორებთ, შემდეგ აქ მიწისქვეშა გაყვანილობები მოწესრიგდება და ამის მერე დაიწყება ასფალტის დაგება”.

მისი თქმით სამუშაოები 10 დღეს კიდევ გაგრძელდება.

”გზას ვაფართოვებთ და ვალამაზებთ”, - აცხადებს შპს ”ასტორიას” მუშა უშანგი ინასარიძე.

საარჩევნო საკითხების მკვლევარის ნინა ხატისკაცის განმარტებით, რადგანაც ეს კომპანია ასრულებს სახელმწიფოს დაკვეთას და ხარჯავს საბიუჯეტო თანხას, არ შეიძლება ეს საარჩევნო სუბიექტის სიმბოლიკით კეთდებოდეს. აქედან გამომდინარე, გამოდის, რომ პარტია იყენებს ადმინისტრაციულ რესურსს: ”ასე, ადამიანებს ჰგონიათ, რომ მათ გზას უგებს ”ნაციონალური მოძრაობა”. ეს არის დარღვევა”.

ხატისკაცის განცხადებით, ეს არის ამომრჩევლის მოსყიდვაც: ” საარჩევნო პერიოდში ეკრძალება კერძო კომპანიას შეასრულოს სახელმწიფოს ფუნქცია და ვთქვათ ვიღაცას სახლი გადაუხუროს, თუ ის არ ღებულობს მონაწილეობას საარჩევნო შესყიდვებში. ეს იკრძალება სწორედ იმიტომ, რომ არ მოხდეს ამომრჩევლის მოსყისდვა საარჩევნო პერიოდში”.

ამ შემთხვევაში კი, ხატისკაცის თქმით, პარტიის რეკლამითა და სახელმწიფოს ფულით კერძო კომპანია მომსახურებას უწევს ამომრჩეველს.

”საერთაშორისო გამჭვირვალობა - საქართველოს” იურისიტის ირინე ურუშაძის განცხადებით, ნებისმიერ საერთაშორისო აქტშია ჩანაწერი იმის შესახებ, რომ პარტია და ხელისუფლება არ უნდა იყოს აღრეული: ”სახელმწიფო ბიუჯეტით გაკეთებული ღონისიება, მიუხედავად იმისა, რომ ამაზე ჯერ ტენდერი ცხადდება და შემდეგ რომელიმე იურიდიული პირი ახორციელებს, სახელმწიფო ბიუჯეტით გაკეთბული ნებისმიერი საქმე, სადაც პარტიული სიმბოლიკა არის გამოყენებული, აღიქმება როგორც ადმინსიტრაციული რესურსის გამოყენება”.

ურუშაძის განცხადებით, ეს არის იურიდიული პირის მხრიდან უკანონო შემოწირულობა, რადგან ამით რეკლამას უწევს პარტიას, შესაბამისად ის ხარჯს გასწევს ირიბად პარტიისთვის: ”იურიდიული პირისგან კი შემოწირულობის გაკეთება აკრძალულია”.



[თამუნა უჩიძე, ახალციხე]