”ხვალიდან აღდგება მოძრაობა, დღეს პარალიზებულია. დადიან მანქანები, ჩამოჰყავთ ხალხი, შემდეგ ჩამოყვანილ ხალხს ისევ უკან წაიყვავნენ სოფლებში”, - გვიხსნის ახალციხის ავტოსადგურის მორიგე ოთარ მჭედლიძე.
პირველი ციხის ტერიტორიაზე ვალიდან ჩამოსული ათი სამარშრუტო ტაქსი მივიდა. როგორც ვალელები ამბობენ, მათ ახალციხემდე ჩამოყვანას ორგანიზება ვალეში დასუფთავების სამსახურის უფროსმა ზურაბ დემეტრაძემ გაუკეთა.
”ვალიდან ჩამოვედით ჩვენი სურვილით, ორგანიზება გაუკეთა ჩვენმა უფროსმა, ზურაბ დემეტრაძემ, ეს არის ვალეში დასუფთავების უფროსი. მან გვითხრა რომ უნდა წამოვსულიყავით, ყველას გვინდოდა წამოსვლა, მაგრამ ამ ყველაფერს ორგანიზება ხომ უნდოდა. ათი ავტობუსით ჩამოვედით, მგზავრობის ღირებულება ჩვენ არ გადაგვიხდია”, - ამბობს ვალის მკვიდრი იზოლდა გიქოშვილი.
დემეტრაძემ წამოიყვანა ახალციხეში შუშანა ხითარიშვილიც: ”სააკაშვილს ველოდები, ბევრ რამეში დამეხმარა, ვალე გაალამაზეს, ასფალტი დააგეს, დახმარება მოგვცეს, პროდუქტი დაგვირიგეს, სახურავები გაგვიკეთეს”.
”უბნის მანაქანით” ჩამოვიდა ახალციხემდე ვასიკო ათუნაშვილი: ”პრეზიდენტი უნდა ვნახო, თან ციხეს დავათვალიერებ”.
ციხის ტერიტორიაზე შეკრებილი არიან სოფელ ვალის მკვიდრებიც. მიუხედავად იმისა, რომ წელს ათობით ტონა კომბოსტო და კარტოფილი მიწაში დამარხეს და ახლა აღებული კრედიტების გასტუმრება უჭირთ, აცხადებენ, რომ მაინც ამ მმართველ პარტიას უჭერენ მხარს.
”წამოვედით რომ ვნახოთ სააკაშვილი, ძალიან მიყვარს და მიხარია მისი ნახვა, მინდა რომ სულ გამარჯვების გზით იაროს, საქართველო წინ წამოსწია, მესხეთსაც მოხედა, - აცხადებს თამარ ზურაბაშვილი - პენსია 110 ლარი მაქვს, 30 ლარს დახმარებას ვიღებ, არასდროს მიგვინადება”.
ზურაბაშვილს უნდა რომ პრეზიდენტამდე მივიდეს: ”არ მიგვიშვებენ, თორემ ვთხოვდი რომ სოფელს მოხედოს, წელს 40 ტონა კომბოსტო მიწაში დავმარხე. იქნებ ცოტა კომპენსაციაც დაგვირიგონ, ისე როგორც კახეთში დაარიგეს”.
იგივე სათხოვარი აქვს პრეზიდენტთან სურენ არუთუნოვსაც: ”40 ტონაზე მეტი კომბოსტო გადავყარე, ასე იმიტომ მოხდა უცხოეთიდან შემოდის პროდუქტი და მერე ქართულს ვეღარ ვასაღებთ”.
ასევე ვალის მკვიდრი, 21 წლის დათო მამასახლისი აღფრთოვანებას ვერ მალავს ახალციხის ციხით: ”მოეწყო უბნები, დაიგო ტრასები, ძალიან დიდი იმედი მაქვს ამ ხელისუფლების. პრობლემა კი უმუშევრობაა. ნინოწმინდაში ვმუშაობდი რკინიგზის კომპანია იყო, მაგრამ იქ სულ აზერბაიჯანელები შემოიყვანეს და ვეღარ გავჩერდი, ქართველებს აღარ დაგვედგომებიდა”.
ამ ხელისულფების იმედი აქვს სალომე თელიაშვილსაც, პრობლემა კი რომელზეც ყურადღემას ამახვილებს კარტოფილის ფასია: ” ჩვენ კარტოფილს 40 თეთრად ვყიდით, სათესლე კარტოფილის ფასი კი 2,75 ლარია”.
პრეზიდენთან სიხარულითა და პრობლემების სათქმელად მოსულებს შორის. იყვნენ იძულევით მოყვანილებიც. ასეთები პრესასთან კომენტარის გაკეთებისგან თავს იკავებდნენ, ან მხოლოდ მას შემდეგ გვესაუბრებოდნენ, როცა დარწმუნედებოდნენ რომ ჩამწერი გამორთული გვქონდა.
”ჩემზე კონტროლი ხორციელდება. აქ იმიტომ ვარ. პედაგოგი ვარ აგარიდან”, - გვითხრა ქალბატონმა და ცრემლი მოერია.
[თამუნა უჩიძე, ახალციხე]