NDI: არჩევნებზე მისული ამომრჩევლების უმეტესობამ გადაწყვეტილება საარჩევნო კამპანიის დაწყებამდე მიიღო

NDI-ის მიერ გამოკითხულთა 77% აცხადებს, რომ არჩევნების პირველ და მეორე ტურზე გამოცხადდა. ამათგან, 62% ამბობს, რომ გადაწყვეტილება, ვის მისცემდა ხმას, საარჩევნო კამპანიის დაწყებამდე, ივლისამდე მიიღო; საარჩევნო კამპანიის განმავლობაში მიიღო გადაწყვეტილება, ამომრჩეველთა 27%–მა; არჩევნების დღეს გადაწყვიტა ვისთვის უნდა მიეცა ხმა 11%–მა.



აღსანიშნავია, რომ საარჩევნო კამპანიის დაწყებამდე პოზიცია ენმ–ს მომხრეებს უფრო ჩამოყალიბებული ჰქონდათ, ვიდრე „ქართული ოცნების“.
ივლისამდე იცოდა ვის მისცემდა ხმას, „ქართული ოცნების“ მხარდამჭერთა 68% და ენმ–ს მხარდამჭერთა 75%–მა; საარჩევნო კამპანიის მიმდინარეობისას გადაწყვიტა „ოცნების“ მხარდამჭერთა 24% და ენმ–ს მხარდამჭერთა 16%–მა.



ეროვნულ-დემოკრატიულმა ინსტიტუტმა (NDI) და CRRC–საქართველომ 2016 წლის ნოემბერ-დეკემბერში ჩატარებული საზოგადოებრივი აზრის კვლევის შედეგების მეორე, პოლიტიკური ნაწილი ნაწილი დღეს წარადგინა.

გამოკითხვა 2016 წლის 4 ნოემბერი-4 დეკემბრის პერიოდში, საქართველოს მასშტაბით 3,141 პირისპირ ინტერვიუს წარმომადგენობითი შერჩევის საფუძველზე, ქვეყნის ქართულ, სომხურ და აზერბაიჯანულენოვან მოსახლეობას შორის ჩატარდა (ოკუპირებული ტერიტორიების გამოკლებით). კვლევაში საშუალო ცდომილების ზღვარი არის +/- 1,8%. NDI-ის კვლევებს აფინანსებს შვედეთის საერთაშორისო თანამშრომლობის განვითარების სააგენტო (Sida) და ატარებს CRRC-საქართველო.

[ნინო ნარიმანიშვილი, ახალციხე]