ახალციხელი ახალგაზრდები ალექსანდრე ქართველის მოღვაწეობას გაეცნენ

„ალექსანდრე ქართველის საერთაშორისო საზოგადოების“ დამფუძნებელმა და პრეზიდენტმა ლელა ქართველიშვილმა ახალციხელ მოსწავლეებთან ალექსანდრე ქართველის მოღვაწეობაზე ისაუბრა.

„იგი გახლდათ მსოფლიო დონის გენიოსი, რომელიც ამერიკაში მოღვაწეობდა და პრაქტიკულად მან შექმნა ამერიკის სამხედრო ავიაცია. ის ამერიკის ენციკლოპედიაში მოხსენიებულია, როგორც ამერიკის სამხედრო ავიაციის პიონერი. რადგან ალექსანდრე ქართველი იყო გასაიდუმლოებული პიროვნება და დიდი სამხედრო ჩინის მატარებელი, ამიტომ უცნობია ჩვენი საზოგადოებისთვის და ახალი თაობის ამერიკელებისთვისაც“, – ამბობს ლელა ქართველიშვილი.

ახალგაზრდებთან შეხვედრა პროექტ „მომავლის თაობის“ ფარგლებში გაიმართა. პირველ ეტაპზე რეგიონებში სანიფორმაციო–გაცნობითი ხასიათის შეხვედრები ჩატარდება, ახალი სასწავლო წლიდან კი მეორე ეტაპი დაიწყება, რომელიც საკონკურსო ხასიათის იქნება.

„დღეს ასევე მოწვეული გვყავს ორი ახალგაზრდა, რომლებიც ახლო მომავალში ნასაში გაემგზავრებიან. ვინაიდან ალექსანდრე ქართველი მოღვაწეობდა ნასას ცენტრში, გვინდა, რომ ამ ახალგაზრდებმა დეტალურად გაიგონ მის შესახებ“, – ამბობს ახალციხის ახალგაზრდული ცენტრის დირექტორი მაკა სუდაძე.

2016 წელს ალექსანდრე ქართველის დაბადებიდან 120 წელი სრულდება. ლელა ქართველიშვილის თქმით, მათი სურვილია, რომ ეს წელი ალექსანდრე ქართველის წლად გამოცხადდეს. ამავე წელს გაიხსნება მუზეუმი: „ეს არ იქნება მხოლოდ ალექსანდრე ქართველის მუზეუმი, გადავწყვიტეთ, რომ დავარქვათ ქართულ–ამერიკული სახლი, რომელიც ასევე იქნება სამეცნიერო, საგანმანათლებლო და კულტურული დატვირთვის. ამერიკელები გვპირდებიან ერთ–ერთი თვითმფრინავის გადმოცემას, რომელიც გვინდა მუზეუმის ტერიტორიაზე ჩამოვიტანოთ“.



[თამარ თოთაძე, ახალციხე]