ალექსანდრე ჯეჯელავა:ჩაჭრა და გამოცდა ცხოვრების მიერ გამოცდილი პედაგოგისთვის არის სირცხვილი

საქართველოს განათლების მინისტრის განმარტებით კარიერული წინსვლისთვის პედაგოგებს გამოცდების ჩაბარებისას ბარიერი აღარ ექნებათ, შესაბამისად ისინი გამოცდაში ჩაჭრილ პედაგოგებად აღარ მოიხსენიებიან.

„ერთადერთი განსხვავებაა - გამოცდას ბარიერი არ აქვს. ეს ნიშნავს, რომ შესაძლოა ქულები არ მეყოს დაწინაურებისთვის, მაგრამ ჩაჭრილი არ ვარ. იმიტომ, რომ ჩაჭრა და გამოცდა ცხოვრების მიერ გამოცდილი პედაგოგისთვის არის სირცხვილი. ამ პრაქტიკაზე ჩვენ უარი ვთქვით“, – განაცხადა ალექსანდრე ჯეჯელავამ.

მისივე თქმით, პედაგოგების გამოცდებს პროფესიულ უნარებშიც ჩააბარებენ.

„დაემატა მეორე მიმართულება. ეს არის პროფესიული უნარების გამოცდა. ეს არის ფაქტობრივად ალტერნატივა, რომელიც შეუძლია ჩააბაროს. თუ პედაგოგი პროფესიული უნარების გამოცდას ჩააბარებს, უკვე საგნობრივი ტრენინგი მოუწევს. პირველ შემთხვევაში უნარების ჩაბარება უწევდა, აქ კი - საგნობრივის. მერე ისევ შიდა სასკოლო დაკვირვება და ესეც გადალახა. მესამე სცენარი არის, როდესაც პედაგოგი ორივე გამოცდას აბარებს და ეს პროცესი კიდევ უფრო მარტივი ხდება“, – განმარტავს ალექსანდრე ჯეჯელავა.

განათლების მინისტრი იმედოვნებს, რომ პედაგოგები ბევრად უფრო მარტივად გაართმევენ თავს ახალი სქემით შემუშავებულ გამოცდებს:"ჩვენ იმედი გვაქვს, რომ პირველ ორ წელიწადში თუ პედაგოგების 25%-მა გადალახა ბარიერი, ვფიქრობ, შემდეგ ორ წელიწადში კიდევ უფრო მეტი, ანუ 25%-ზე მეტი შეძლებს. წელიწადში 10-12% დაწინაურებული პედაგოგი განახლებული ცოდნით ზღაპრული, არაჩვეულებრივი შედეგია“.

[sknews.ge]