ბენეფიციარებს აგრობარათებზე ქულები ჩაერიცხათ

სოფლის მეურნეობის სამინისტროს ინფორმაციით, ქულები ჩაერიცხა იმ 279,617 ბენეფიციარს, რომელთაც საკუთრებაში ან ფაქტობრივ მფლობელობაში გააჩნიათ 0.25 ჰა.-მდე მიწის ფართობი. ბარათებზე ჩარიცხულმა ჯამურმა სარგებელმა 15,191,640 ლარი შეადგინა.

სამინისტროს ინფორმაციით, აგრო მაღაზიებში სპეციალური ტერმინალების დარიგება ეტაპობრივად მიმდინარეობს. აღმოსავლეთ საქართველოში ბენეფიციარებს უკვე საშუალება აქვთ შეიძინონ პროექტით განსაზღვრული სასოფლო სამეურნეო საქონელი (სასუქი, სათესლე მასალა, მცენარეთა მოვლის საშუალებები, ნერგები). დასავლეთ საქართველოში აგრო ბარათებით სარგებლობა ბენეფიციარებს 20 მარტიდან შეეძლებათ.

მცირემიწიან ფერმერთა საგაზაფხულო სამუშაოების ხელშეწყობის პროექტის ბოლო ეტაპი 2015 წლის თებერვალში დაიწყო და მის ფარგლებში სარგებელს 800,000 მცირემიწიანი ფერმერი მიიღებს. ბენეფიციარებს საშუალება ექნებათ დაამუშაონ მიწა ან მიიღონ სასოფლო-სამეურნეო საქონელი აგრო ბარათებზე ჩარიცხული ქულების გამოყენებით.

ზუსტი ინფორმაციის მისაღებად, იმის შესახებ თუ სად შეიძლება ამ ეტაპზე აგრო ბარათის გამოყენება, შეგიძლიათ დარეკოთ სააგენტოს ცხელ ხაზზე: 247 01 01.

[Sknews.ge]