სამი ახალგაზრდის მკვლელობის საქმეს ერთი საქმე გამოეყო

ამის შესახებ „სამხრეთის კარიბჭეს“ სამცხე–ჯავახეთის საოლქო პროკურატურაში დაუდასტურეს. მანამდე, კი აღნიშნულის შესახებ, 10 მარტს, სამი ახალგაზრდის მკვლელობაში ბრალდებულის დავით კუბლაშვილის სასამართლო პროცესზე, სამხარეო მთავარი სამმართველოს გამომძიებელმა გიორგი ფარცახაშვილმა ჩვენების მიცემისას განაცხადა.

ადვოკატების კითხვაზე, დაინტერესდა თუ არა გამოძიება, რატომ ჰქონდა სხეულზე დაზიანებები დაკავებისას ბრალდებულს, ფარცახაშვილმა უპასუხა, რომ ამას სამმართველო ჯერ კიდევ იძიებს.

2014 წლის 28 აგვისტოს, დაბა ადიგენში, ყარათუბანში მცხოვრებლებს შორის ჩხუბი მოხდა. გამოძიება სწორედ ამ ფაქტზე, სსკ–ის 125–ე მუხლით მიმდინარეობს.

შეგახსენებთ, სამი ახალგაზრდა: ვაჟა ნარიმანიშვილი, გიორგი სირბილაძე და ბორის სირბილაძე 2014 წლის, 28 აგვისტოს, მარიამობის ღამეს, მოკლეს. ერთ-ერთი გარდაცვლილის ძმა, ბექა სირბილაძე კი ფეხისა და გულ–მკერდის არეში დაჭრეს. მკვლელობაში ბრალდებული სამართალდამცველებმა ცხელ კვალზე დააკავეს.

[თამუნა უჩიძე, ახალციხე]