რიტუალების სახლი – უცვლელი პრიორიტეტი ადიგენში

სოფლის მხარდაჭერის პროგრამის ფარგლებში, ადიგენის მუნიციპალიტეტისთვის გამოყოფილი 545 017 ლარიდან თანხის დიდი ნაწილი, რიტუალების სახლებისთვის დაიხარჯება. ადიგენის მუნიციპალიტეტის გამგეობამ სამი ტერიტორიული ერთეული, დაახლოებით 15 სოფელი პრიორიტეტების შერჩევის მიზნით, უკვე შემოიარა. ადიგენის მუნიციპალიტეტის გამგებლის ზაქარია ენდელაძის განცხადებით, ერთ–ერთი რიგით პირველი პრიორიტეტი რიტუალების სახლია.

„პირველ პრობლემად ისევ რიტუალების სახლები რჩება. იქ სადაც დაიწყო რიტუალების სახლის გაკეთება, უნდა დასრულდეს. როცა ერთი ობიექტი საჭიროებს დასრულებას და იმას თუ არ დაასრულებ, რაც გაკეთებულია ისიც გაფუჭდება“, – ამბობს ენდელაძე და ამატებს, რომ პრიორიტეტებს შორის წყლის მილების შეცვლა და სათავე ნაგებობების შეკეთებაც სახელდება.

„დემოკრატ მესხთა კავშირის“ ხელმძღვანელი გიორგი ანდღულაძე აცხადებს, რომ რიტუალების სახლების მშენებლობა სოფლისა და მისი ინფრასტრუქტურის განვითარებისთვის მნიშვნელოვნად არაფერს ცვლის: „ეს სოფელს გარკვეულ საჭიროებას უხსნის, მაგრამ საბოლოო ჯამში მის განვითარებას არაფერს აძლევს“.

მისი თქმით, იმ შემთხვევაში, როცა თანხა სოფლის მნიშვნელოვანი პრობლემის გადაწყვეტას ვერ წვდება, მაშინ მის დახარჯვას რიტუალების სახლზე არჩევენ, თუმცა, უკეთესი იქნება თუ თანხას შეინახავენ და გრძელვადიან პერსპექტივაში, მაგალითად სარწყავი წყლის პრობლემას მოაგვარებენ: „სარწყავი წყალი უფრო დიდ ეფექტს მოუტანს სოფელს და მის განვითარებას, ვიდრე რიტუალების სახლი“.

ანდღულაძის განცხადებით, ამის შესახებ ადგილობრივი თვითმმართველობის წარმომადგენლებმა მოსახლეობას კარგად უნდა აუხსნან: „თუმცა, თუ რიტუალების სახლის მშენებლობა დაწყებულია, ის რომ უნდა დასრულდეს, ამაზე არავინ დავობს. მაგრამ არის შემთხვევები, როცა უკაბელო მიკროფონებს და დინამიკებს ყიდულობენ და არ იციან ფული რაში დახარჯონ“.

გასულ წელს ადიგენის მუნიციპალიტეტში 57 დასახლებული პუნქტიდან 25–ში (ბენარა, შოლავერი, უნწა, ხევაშენი, გორგული, იჯარეთი, ვარხანი, წახანწყარო, დიდი ზანავი, პატარა ზანავი, გომარო, ამხერი, მლაშე, არზნე, უტყისუბანი, ციხისუბანი, ნამინაური, დერცელი, უდე, ზემო ენთელი, შოყა, დიდი სმადა, ჭეჭლა, ჭელა, კეხოვანი) თანხა რიტუალების სახლებზე დაიხარჯა.

წელს რამდენ სოფელში შეირჩევა პრიორიტეტად რიტუალების სახლები 22 მარტისთვის გაირკვევა. პრიორიტეტების შერჩევა სწორედ ამ დროისთვის უნდა დასრულდეს.

[თამუნა უჩიძე, ახალციხე]