სამცხე–ჯავახეთში მცხოვრებ შშმ პირებს ეტლები გადასცეს

შშმ პირებს ეტლები საერთაშორისო ასოციაცია "საქართველოს ქალები მშვიდობისა და სიცოცხლისთვის" წარმომადგენლებმა გადასცეს. 19–დან 9 ახალციხეში, 7 ადიგენსა და 3 ნინოწმინდაში გადანაწილდა.

„სხვა პროექტებთან ერთად, ჩვენი ორგანიზაცია ახორციელებს პროექტს, რომლის მიზანია შეზღუდული შესაძლებლობის მქონე პირთა დახმარება. სამი წლის განმავლობაში დაახლოებით 1.050 ეტლი გვაქვს დარიგებული, აქედან ნაწილი აქტიური ეტლია, ნაწილი სტანდარტული“, – ამბობს საერთაშორისო ასოციაცია „საქართველოს ქალები მშვიდობისა და სიცოცხლისთვის“ თავმჯდომარე მაია კვეზერელი–კოპაძე.

მისივე თქმით, შეზღუდული შესაძლებლობის მქონე პირების შესახებ ინფორმაცია სამცხე–ჯავახეთის სამხარეო ადმინისტრაციისგან მიიღეს. ეტლები ყველასთვის ინდივიდუალურია.

38 წლის კობას მშობლები ამბობენ, რომ მათ შვილს გადაადგილება არ შეუძლია და ეტლი სჭირდებოდა: „შესაძლებლობა არ გვაქვს, რომ ეტლი ვიყიდოთ. სადმე წაყვანა რომ გვინდა, ვერ მიგვყავს, ან მანქანით გადაგვყავს. 2005 წელს გადმოგვცეს საჩუქრად, მაგრამ ის უკვე მოძველებული იყო“.

[თამარ თოთაძე, ახალციხე]