ახალციხის გამგეობის ყოფილმა თანამშრომელმა თავი ჩამოიხრჩო

გაგა ივანიძე ახალციხის მუნიციპალიტეტის სოფელ ურაველში, საკუთარ სახლში გარდაცვლილი მეზობლის ბავშვებმა, დღეს საღამოს, დაახლოებით 19:00 საათზე ნახეს. შემთხვევის ადგილზე მობილიზებულია პოლიცია.

როგორც ადგილობრივები „სამხრეთის კარიბჭესთან“ ყვებიან, გაგა ივანიძე სოფელში საკუთარი მანქანით დღეს მივიდა: „ბიცოლამისს დაუნახავს მანქანა, მერე რომ აღარ გამოჩენილა, მეზობლის ბავშვები გაუგზავნია, ნახეთ რას აკეთებს, როგორ არისო. გარდაცვლილი ბავშვებს უნახავთ და მათ ჩამოუხსნიათ“.

ივანიძე ახალციხეში ცხოვრობდა, მშობლიურ სოფელში სახლს, სადაც ამჟამად არავინ ცხოვრობს, ხშირად სტუმრობდა.

იგი წლების განმავლობაში ახალციხის მუნიციპალიტეტის გამგეობაში საფინანსო–საბიუჯეტო სამსახურის ხელმძღვანელად მუშაობდა. თანამდებობა 2013 წლის გააზაფხულზე დატოვა და ახალციხეში „ბურჯანაძე – დემოკრატების“ შტაბის ხელმძღვანელად გადავიდა. აქ დაახლოებით სამი–ოთხი თვე დაჰყო და 2013 წლის საპრეზიდენტო არჩევნების შემდეგ პარტიიდან წამოვიდა.

ამ დროისთვის იგი უმუშევარი იყო. როგორც მისი ახლობლები და თანასოფლელები აცხადებენ, ბოლო დროს მას ფინანსური პრობელმები ჰქონდა.

„ყველას უკვირს, არავინ იცის რა მოხდა, ასე რატომ მოიქცა“, – ამბობენ ურავლელები.

მათივე თქმით, მომხდარის მიზეზზე საუბარი მეუღლესაც უჭირს: „ამბობს, ყოველთვის უთქმელი იყო. არ ვიცი ამის ჩადენა რამ აიძულაო“.

გაგა ივანიძეს მეუღლე და ორი მცირეწლოვანი შვილი დარჩა.

შინაგან საქმეთა სამინისტროს ინფორმაციით, მომხდარზე ძიება სსკ-ის 115-ე მუხლით დაიწყო, რაც პირის თვითმკვლელობამდე მიყვანას გულისხმობს.

[თამუნა უჩიძე, ახალციხე]