ახალციხეში კულტურის განყოფილების ყოფილ გამგეებს მადლობის სიგელები გადასცეს

კულტურული ღონისძიება, დღეს, 19 თებერვალს, „ახალციხის ციხეზე“ მოეწყო. ქალაქ ახალციხის მუნიციპალიტეტის მერიის კულტურის სამსახურის ორგანიზებით გამართულ საღამოს, ქალაქის მერიის, გამგეობის, სამხარეო ადმინისტრაციის და კულტურის სფეროს წარმომადგენლები ესწრებოდნენ. ღონისძიებაზე მიწვეული იყო ახალციხეში კულტურის განყოფილების ყველა ყოფილი გამგე. 1946 წლიდან 2014 წლამდე კი ახალციხეში კულტურის განყოფილებას 17 გამგე ჰყავდა.

„გვინდა, რომ იმ ადამიანების ღვაწლი დავაფასოთ, ვინც კულტურის სფეროში მოღვაწეობდა, კონკრეტულად კი კულტურის განყოფილების გამგეები. დღევანდელ ღონისძიებაზე მოსვლა ყველამ ვერ მოახერხა, სამწუხაროდ რამდენიმე უკვე გარდაცვლილია, დანარჩენები კი ჯანმრთელობის მდგომარეობის გამო ვერ მოვიდნენ“, – ამბობს მერიის კულტურის სამსახურის უფროსი მარინა გოგოლაძე.
ღონისძიებას კულტურის განყოფილების გამგეებიდან მხოლოდ ირა კურტანიძე და ელგუჯა კოპაძე ესწრებოდნენ.

„10 წელი ვიყავი კულტურის განყოფილების გამგე. ამ ხნის განმავლობაში გვქონდა წინსვლაც, გამარჯვებაც. ჩემი მოღვაწეობის პერიოდში გაიხსნა სამხატვრო სკოლა და თოჯინების თეატრი. ძალიან დიდი შრომა გვაქვს გაწეული ამ პერიოდში. ეს წლები ძალიან კარგად მაგონდება“, – ამბობს ირა კურტანიძე.

ირა კურტანიძე კულტურის განყოფილების უფროსი 1981 წლიდან 1991 წლამდე იყო, ხოლო ელგუჯა კოპაძე 1972 წლიდან 1977 წლამდე. ახალციხის კულტურის განყოფილების პირველი გამგე კი 1946 – 1949 წლებში ელგუჯა კოპაძის მამა გიორგი კოპაძე იყო.

ახალციხის მერმა გიორგი კოპაძემ და სამცხე – ჯავახეთის გუბერნატორის მოადგილემ ავთანდილ კაჭკაჭიშვილმა ირა კურტანიძესა და ელგუჯა კოპაძეს მადლობის სიგელები და საოჯახო ტექნიკა გადასცეს.



[მანანა სარაშვილი, ახალციხე]